喺早前舉行嘅美國底特律車展上，紳寶車廠展出咗一款名為9-3X嘅概念車，深受一眾車迷歡迎；而最近外國方面就傳來消息，話呢部9-3X概念車，將會與快將推出嘅新一代9-3車系相近，並預計會推出四輪驅動版本，以增強新車嘅競爭力㖭。
快者可望於今年9月喺英國推出嘅新一代9-3車系，據說造型設計將會與9-3X概念車相近，當中車首設計會係兩者最相似嘅部分，同樣採用大型頭燈配搭，除望落頗有神氣外，而且亦能於晚間行車時，為你提供充裕嘅照明。至於車廂布局方面，新車除仍保留有9-3車系原來嘅豪邁氣派外，更新加有不少電鍍裝飾，從而予人留有深刻印象；但由於新車仍屬設計階段，故有待廠方公布有關資料後方可作實。
然而，據聞廠方更會為新車裝上一台全新嘅2.8公升V6Turbo引擎，馬力輸出高達280匹，用以驅動此車可謂綽綽有餘；而頂級版更有機會配用一套四驅系統，用以抗衡富豪XC90、奧迪AllroadQuattro及寶馬X5等車款㖭。有興趣嘅車迷，就不妨拭目以待喇。