中國國腳真係今時唔同往日，部分重獅子咁大個鼻。據sports.163.com披露，部分國腳好沙塵，「寸王之王」首推嗰個中國足球先生李鐵，嚟到香港時已經十問九唔應，又東張西望，日前更唔肯攞住張「恭喜發財」嘅揮春影相，然後好唔耐煩咁同記者講：「行了，行了，你們也累了，大家歇歇吧。」好有個性咁，求驗客相信呢種人唔會明白「滿招損」嘅顯淺道理。至於話可以做第二個黎明嘅靚仔張玉寧亦唔好得幾多，cool到啲記者都怕咗佢。不過，中國隊都有識做嘅人，例如馬明宇、江津同教練沈祥福就好好多，雖然回答嘅多數係行貨，但係總算令老記交到功課啦。
講個秘密畀大家知，原來英超聯球證普爾可以喺世界盃執法係有佢嘅秘訣，就係成日趕啲球員出場，令佢建立自己嘅硬漢形象；佢重好似好有學問咁話，對球員仁慈等如對自己殘忍。佢呢番言論令英超聯球證總會嘩然，但係睇嚟都無損佢嘅世界盃執法機會，因為總會頭頭都話，每個球證都有佢嘅執法風格喎……如果個個球證咁搞法，英超聯「紅潮風暴」肯定浪接浪囉。
早已收到風話艾華遜對傳媒寸到爆燈，我哋喺費城個同事噚日報料，話有個台灣行家以幾流利嘅英文問艾華遜知唔知道佢頸上嘅「忠」字紋身點解，點知佢以極之不屑嘅眼神昭咗個台灣佬一眼，完全當佢無到，只係掛住同身邊個黑人記者吹水認真招積喎。
據報道日本警方已勒令世界盃期間，所有載住國家隊嘅大巴一律都冇面畀，唔准衝紅燈。其實歐洲嘅名牌國家隊為比賽而衝紅燈呢種事，喺當地好平常嘅，但係日本就唔同，因為佢哋嘅皇室成員出行，亦都咪使旨意衝紅燈。總之，歐洲嘅名牌國家隊一於入鄉隨俗啦。
大球場噚日賣賀歲波飛嘅時間早收一粒鐘，四點就早收工，搞到無人知，令好多球迷摸門釘，其中有十幾個球迷更喺大球場外面鼓譟，好在無事發生。足總話今日佢哋就無飛賣嘞，要買就去大球場買啦，時間係上晝十點鐘開始，但係初四嘅波飛，要入到場先有得賣，門口售票處就欠奉。