恭喜發財，恭喜大家馬年行大運，身體健康，心想事成，笑口常開。
很多香港人都喜歡往外地避年，我就極愛留港度歲。街上人少車少，駕着車遊車河是上佳的節目。停車又不是問題，只要不是在甚麼旺區，又或者將車打橫停在彌敦道，警察叔叔應該都會網開一面，如果係要派發新春牛肉乾，希望都可以用利是封入住，咁就真係大吉利是。
重有幾套賀歲片可以睇，唔係賣花讚花香，但係過年真係好應該搵番套戲睇吓，話晒賀歲片都有一定品質保證，戲院裏面又夠多人，一齊嘻嘻哈哈過新年，幾好意頭。
再唔係可以約啲好耐冇見面嘅朋友飲吓茶、食個包，大年年頭忙到年尾，新春期間想忙都冇得忙，就是可以盡情吹吓水，總結吓舊年大家有咩得失，展望吓來年有咩大計，幾個臭皮匠，諗贏個諸葛亮，話唔定可以度出一條發達大計。
再再唔係可以玩瞓覺，天寒地凍有幾好瞓大家都知，平時想話瞓晏啲但又要起身返工，今勻一於自己話晒事，想瞓幾耐就瞓幾耐，起身食件蘿蔔糕之後又瞓過，過幾日返工嘅時候精神奕奕新人一個，擔保馬年有運行。