明星賽多影視紅星捧場就大家都知道，今次隨手都搵到女歌星BritneySpears同佢男友Sting，《黑超特警組》嘅主角韋史密夫，黑人性格巨星森姆積遜等，而森姆積遜好鬼風騷，完場後走入後台同艾華遜擁抱，重四圍幫人簽名，當正今次係自己新片首映禮做騷咁。
明星賽一完，小記即以迅雷不及掩耳的速度飛奔到東岸明星隊的更衣室，想近距離一睹波神佐敦真身，點知一入到去已見佢換好晒西裝離開更衣室，前後不足五分鐘，唔通因為佢喺第四節冇上過場而冇汗出，唔使沖涼，定係佢老人家因為對炒樽事件而耿耿於懷，盡早鬆人避開班傳媒追訪。
今日係大年初一，為咗應節，連日來都搵咗唔少球星攞住揮春影相，趁眾星散band回家前當然要搵小記嘅偶像傑特同大家拜年，佢爽快答應之餘，重跟小記學講恭喜發財。之後傑特對個揮春極感興趣，重問我可唔可以送畀佢，偶像叫到當然冇問題啦，但條件是係幫我簽名，當做交換新年禮物啦。