港股蛇年歲晚收爐，神勇非常，9字頭升幅超過1成嘅藍籌Call輪，超過50件。有乜窩輪好買，留待馬年開市再推介。
上禮拜五晚杜指升119點，港市隻杜指末日Put輪1717，登上死火輪榜首，收3.5仙，散22%。
1717去年4月面世，發行價25仙，發行量3.50億份，發行商袋咗近9千萬銀（唔係代表可能贏錢之數，因為可能在市場買貨戥倉，有1邊要填氹)。隻輪最威煌時，係911之後升3倍，最高見52仙，當時溢價差不多20%，炒過火。升3倍然後碌低9成幾，見證美股大落大上，亦見證炒輪好易富貴浮雲。
1717本月27日最後買賣，溢價1.3%，槓桿率53.5倍。到期之前，杜指若然繼續升，隻輪冇渣。杜指跌唔夠130點，隻輪亦係冇晒。但杜指若然大跌，例如因乜乜事故急跌500點，則隻輪可升4倍。
賭1717，要預咗冇晒。若然揸重其他Call輪，揸少少1717當作買保險亦無妨（美股若大跌，Call輪輸錢，但隻1717則大賺）。