一元復始，萬象更新，首先祝大家新年有新希望，事事順利。我哋中國人過新年有好多習俗，想新一年行好運，通常都會喺年初一行吓大運，祈求事事順景。事實上，新年同家人一齊行吓大運舒展筋骨，至少可以令身體健康，家庭更融洽，不如一齊去郊外行番轉，呢個活動老少咸宜。如果你相信玄學，依照玄學家提供嘅少少貼士，話唔定真係可以迎春接福。
記者：劉健雄
鳴謝：玄學家李丞責 ImageFamily：仇氏家庭
今日財神喺正東，求財、求賺多啲錢、求橫財最好向呢個方位拜神，入廟拜神，黃大仙就至啱。至於去行大運，新界東面嘅西貢就至適合，呢區有好多郊遊徑、家樂徑、行山路線等等，李丞責話最好去啲近水或者見到水嘅地方，例如水塘、山澗、海灘等，取其「水源充足」嘅好意頭，最好順便裝番壺山水、海水或者海沙返屋企擺吓，咁就夠晒意頭。行完大運，重可以買條金魚，或者買條褲，咁就金銀滿屋，大富大貴嘞。
發財路線一：上窰郊遊徑
近住萬宜水庫西壩嘅上窰郊遊徑又係近住水嘅，起點喺北潭涌嘅復興橋，經過涌泮嘅百年古村上窰，呢度係一間民俗文物館，不過初一至初三都休息。喺文物館之後嘅山坡就係上窰郊遊徑，呢條以石塊鋪得平整嘅郊遊徑會一直通向204米嘅山仔擺頭墩，一路上可以俯覽沿岸嘅黃宜洲、起子灣、曬罟灣等昔日漁村，喺山頂可以俯視萬宜西壩同西貢海眾島嶼，最後經萬宜水庫西壩沿西頁萬宜路返北潭涌，呢條路難度唔高，一般人都啱行。
交通：鑽石山地鐵站搭九巴96R、西貢搭94號(往黃石碼頭)喺北潭涌落車
發財路線二：麥理浩徑第二段(北潭坳－赤徑－西灣亭)
呢條遠足徑可以話集香港郊野山海風光嘅精華，從北潭坳開始可俯視黃石碼頭，途經赤徑嘅田疇同老村，重有號稱香港最靚海灘嘅大浪海灣，對本地人同外國遊客嚟講都係意想不到嘅驚喜，所以香港政府早喺1999年已經將呢條路線介紹畀外國遊客。呢條線全程約8公里，要早啲開始行，由半山嘅北涌坳開始落斜、經赤徑、大浪坳、鹹田灣、西灣至西灣亭。
交通：同左，不過喺北潭坳落車
如果你想祈福、求人緣、健康、家宅平安，甚至想搵番唔見咗隻狗，都可以向西南方，因為喜神喺正西南方。大嶼山嘅東涌、大澳、寶蓮寺等地方都喺正香港嘅西南方，係行大運祈福嘅最佳地點。李丞責話天后娘娘有能力克服水厄，所以可祈福，呢度有天后廟、楊侯廟、佛寺等，都係祈福嘅好地方。
行運路線一：法門古道
新春好多人都會參拜吓寺廟，如果可以呼吸吓新鮮空氣就更加好。「法門古道」由昂坪寶蓮寺附近嘅昂坪奇趣徑嘅「東山法門」牌坊開始，可以喺寶蓮寺拜完佛先行，一條石屎步道一路落斜到東涌石門甲，沿途綠樹成蔭，而且路途平坦，一家大細都啱。古道途經大嶼山五大禪林之一嘅地塘仔，山中隱藏二十幾間禪院、佛寺、精舍，係香港嘅「廟宇之鄉」。
交通：東涌搭大嶼山巴士23號到寶蓮寺
行運路線二：東涌至大澳海岸古道(經沙螺灣及深屈)
要參觀香港西南邊界嘅漁村兼迎接喜神就要行呢條路，呢條路本來係古代大嶼山西北各漁村之間嘅陸上交通要道，雖然好平坦，不過長成十公里，一定要帶足糧水。古道由東涌侯王宮附近嘅侯王橋開始，經過機場對面嘅沙螺灣，再行過啲就係深屈，平時呢啲小漁村都係得啲老人家居住，新年期間啲後生返晒嚟就好熱鬧，最後沿住海邊小徑行到大澳，大澳亦有好多廟宇可以參拜。
交通：東涌市中心搭大嶼山巴士38號或N38號往逸東邨
如果你從事文職工作或正在求學，想保住份工或者想搵份好工，不妨向南方求文昌。香港島喺香港境內嘅南方，最利文昌，上環啱啱有間文武廟，最啱求文昌，參拜完文武二帝，不妨買番套文具，更加老嚟。或者可以試吓用毛筆寫「元旦初試筆萬事如意皆迪吉」，可助求學、文職工作人士，事事順境，提高個人表達，使事業或學業更進一步，至於行大運，香港島嘅地點都唔少。
搵好工路線：大潭水塘道
想仔女讀書叻啲，唔一定要食乜嘢奶粉，帶佢哋行吓大運就得啦。大潭水塘道係一條平坦嘅林道，沿途綠樹成蔭，長約五公里，一家大細都啱行，途經大潭四大水塘，有風生水起嘅意頭，從黃泥涌峽道或者大潭道進入都得，一路上都有好多燒烤爐，可以一早喺陽明山莊嘅超級市場買齊燒烤用品燒嘢食。沿路上又有不少古老建築物，好似百年嘅水壩，同戰時嘅遺迹，都好值得睇吓。
交通：城巴6號、41A、61號、76號、新巴63號、66號(黃泥涌峽道落車)；城巴314號、新巴4號(大潭道落車)
據玄學家李丞責講，年初一喜神喺西南方，財神喺正東，而正南方則有文昌。出門「行大運」可選呢三個方位行山、拜年造訪、入廟上香等。夾正好嘅出門時間重有着數，可選擇己丑(凌晨1時至3時)、甲午(上午11時至下午1時)、及乙未(下午1時至3時)吉時。己丑時有「青龍」吉星，象徵有利事業發展，乙未時有「明堂」吉星，象徵有發揮才能，表現自己嘅機會。而今日就忌向正北，向呢個方向嘅親友拜年，或者入呢個方向嘅廟上香拜神都唔係咁好，最好改另一日。