恭喜發財！今日係馬年嘅大年初一，除咗去拜年之外，另一個必定要參與嘅賀年節目，當然係睇一年一度嘅賀歲花車巡遊。今年嘅國際花車和國際表演隊伍係歷年之冠，而且重係全港第一次由真馬馬車帶領巡遊隊伍作表演。無論你係做現場觀眾抑或留響屋企睇直播，記緊擔定櫈仔霸頭位！
記者：招佩珊 部分攝影：陳陶鈞
適逢馬年，今年由香港旅遊發展局主辦的花車巡遊，亦相應加入了同「馬」有關的表演項目。巡遊隊伍由一匹真馬拉動開篷馬車帶領，揭開花車巡遊的序幕。負責拉車的兩匹馬專程由英國抵港，是歷年花車巡遊的第一次。
此外，響今個月月初剛獲香港旅遊發展局委任為「動感之都：就是香港！」大使的郭富城，更會參與是次花車巡遊。佢除咗會響巡遊開幕典禮上擔任表演嘉賓，向現場觀眾拜年外，及後更重會乘坐由大會安排的馬車參加巡遊，向沿途觀眾拜賀新歲。
今年除咗國際花車數目為歷年之冠外，到訪的國際表演隊伍總共有15隊，數目亦打破歷年紀錄。當中除了來自世界各國包括澳洲、加拿大、日本、瑞士、新加坡、美國等表演隊伍外，更有5隊來自中國大陸的隊伍上演饒富民族特色的精采表演：例如來自廣州市藝術學校的代表會穿上應節的賀年紅衣獻舞，而新疆吐魯番旅遊藝術團就會即席表現當地的民族舞。
今年到訪齊慶新春的國際表演隊伍雖以大堆頭上陣，但來自本港的一班「本地薑」亦絕不遜色。今年參加巡遊的24隊本地表演隊伍中，大部分都係富有多次表演經驗的隊伍，當中包括已是第5次參與農曆新年巡遊演出的香港警察樂隊，以及連續第4年參加巡遊的香港海關表演隊，更有自1996年起已開始為賀歲花車巡遊表演的王仁曼芭蕾舞團等。
1.分域碼頭街
2.港灣道
3.會議道
2002國泰航空國際匯演時間表
日期：2002年2月12日（壬午年大年初一） 時間：下午1:30至3:30 查詢熱線：25081234
路線：由中環添馬艦廣場出發，沿龍匯道、分域碼頭街，繞經香港會議展覽中心後，返回添馬艦廣場，全程約2公里。
現場直播：1.無綫電視翡翠台直播 2.DiscoverHongKong.com網上直播 添馬艦入場費：嘉賓席座位$200、站立位置$20
門券發售點：香港旅遊發展局旅客諮詢及服務中心（中環皇后大道中99號中環中心地下；九龍尖沙嘴天星碼頭）
花車展覽：巡遊結束後，其中19輛花車將於2月13日（年初二）在中環添馬艦廣場展出，免費讓市民參觀及拍照留念。
相關節目
花車展出
日期：2月13日（年初二）
時間：中午12:00至晚上10:00
國際表演隊現場表演
日期：2月13日（年初二）
時間：下午2:00至晚上8:00
去年睇過花車巡遊兼心水清的觀眾，一定會發現今年的花車隊伍比去年長。皆因今年共有22架花車參加巡遊，比去年的13架多出9架。22架花車中共有9架係來自外國的花車，為歷年國際花車數目之冠。這些國際花車，均會以所屬地區的地方特色作主題，當中包括以3頭馴鹿拉動雪橇、上載來自拉普蘭老家耳朵山聖誕老人的芬蘭花車；馬來西亞花車則以當地藍天碧海及沙灘作主題；泰國花車就將皇宮寺廟等名勝古迹包羅其中。至於香港花車就有13架，最具特色的當然係由真馬拉動的香港賽馬會花車！
精采花車逐架睇
國泰童子賀新歲
國泰航空公司請嚟唔同國籍嘅小朋友同大家拜年，呢啲穿着民族服裝嘅小朋友公仔，每個有成3、4呎高，企得遠遠都一樣睇得到。
葡友勁舞慶新春
一睇個大三巴，就知道係來自澳門的花車。車上設有旋轉平台，重會有捧住澳門特色美食的廚師、三級方程式賽車及媽閣廟。大三巴下面重有來自澳門的舞蹈員即場表演傳統的葡萄牙民族舞。
麥記家族齊到賀
第3年參加賀歲花車巡遊的麥當勞叔叔，會帶埋班老友記漢堡神偷、小飛飛及滑嘟嘟一齊嚟！呢架麥記花車更會以大家熟悉的廣告口頭禪「秒秒鐘歡聚歡笑」為主題，見到佢哋個個都會笑口常開！
韓國公仔來拜年
車頂上兩個穿着傳統韓國民族服飾的公仔叫五彩童子，代表韓國觀光公社同大家拜年。花車唔單止以滑雪及溫泉為主題，重有大大個2002年世界盃標誌作宣傳。
親善微笑拓商機
首次參與巡遊的旅遊服務業協會，花車前放咗個微笑圖案的大型購物袋，凸顯旅遊服務業對香港經濟的重要性。
加國牛仔臨香江
加拿大花車載有鼻孔會噴煙的卡通牛及充滿活力的牛仔，還裝有獨家音響系統，唔使單靠大會音樂助興。
東瀛大白鯊到賀
唔使驚，呢條大白鯊唔會咬人㗎！首次參與農曆年巡遊的日本環球影城，將賣座電影《大白鯊》的主角化身為呢架高13呎、長30呎的花車，而且重話現場會配合特別效果作表演。究竟係乜？賣個關子，睇過就知！