張燊悅早排去咗日本傾拍「無比滴」廣告嘅嘢，佢返咗嚟幾日，今日又再去日本旅行。雖然張燊悅上次去日本嗰陣未到農曆新年，不過佢都乘機去咗東京明治神宮許願，祈求馬年事事順利。
張燊悅喺日本嘅許願過程，係跟足晒日本人傳統，先喺神宮外邊用竹勺子飲泉水，再入廟參拜、又買福袋買許願竹牌。佢將願望寫喺竹牌度，希望新一年媽咪身體健康，自己就唱片大賣，然後再去拜靈樹同捐納金。問佢點解唔求姻緣？佢即刻哈哈大笑話：「塊許願牌太細，寫唔到咁多嘢！」
早排有傳王菲同趙薇喺上海拍賀歲片《天下無雙》時面左左，雖然事後佢哋否認過，但上星期一朝早八點幾，佢兩個同張震、梁朝偉一齊喺機場出發去上海補戲時，見王菲同趙薇一入禁區就各有各行。王菲有經理人陳家瑛陪住，而頭戴冷帽加黑超嘅趙薇，就自己一個人喺免稅店度行嚟行去，有時重會扁嘴㖭，睇嚟趙薇同王菲真係冇乜兩句。
張柏芝自從飛車受傷後，病況已經明顯好轉，前兩日佢重同朋友去行尖沙嘴利時商場，買新衫過年㖭。不過柏芝早排瞓醫院嗰陣，因為打咗石膏唔郁得，悶到抽筋嘅佢，叫每個嚟探佢嘅朋友，喺石膏上面簽名留念，柏芝𠵱家重將個簽晒名嘅石膏擺喺屋企㗎。
彭子晴、黎思嘉同秦漢前晚喺紅磡春季嘉年華，宣傳亞視新劇《勝券在握》。秦漢話佢會喺香港過年，問彭子晴同黎思嘉會唔會帶秦漢去行花市，等佢行桃花運，彭子晴話：「我就唔會喇，我覺得好嘢要留番畀自己。」彭子晴重話後日情人節要做嘢，佢話：「到時我要同陳錦鴻拍咀戲，我過往都同過盧慶輝同張家輝拍過咀戲。」
郭可盈噚日入電視城傾公事，原來佢喺西貢嘅匡湖居新居裝修就嚟搞掂，佢話：「裝修費超過我嘅預算，𠵱家埋單估計要成二百萬，我本嚟預算拎百幾萬出嚟，超支係因為我幾乎全屋翻新，我尤其重視主人房同全屋嘅水電。」後日情人節，佢話會同男友林文龍一齊喺屋企過二人世界。