今日係大年初一，傳統喺呢一日都會煮齋菜食，所以今日專誠邀請煮齋菜有一手的周秀蘭，示範兩款創新齋菜迎新春，聽落感覺平淡嘅齋菜，轉一個全新形象，集齊色香美味於一身，煮法重好容易㖭！
記者：葉少萍 攝影：關文慧 場地提供：寶光素食
地址：銅鑼灣時代廣場食通天12樓1203室
電話：25063377
鳴謝：銅鑼灣時代廣場
呢個冷盤齋菜當中最特別的，當然係素海蜇啦！食落煙煙韌韌，味道同蒟蒻相同，再同甘笋、白蘿蔔、青瓜、紅薑、薄脆、芋頭及素魚片撈起同食，食法同順德名菜風生水起差不多。芋頭絲同薄脆，咬落夠晒脆，而甘笋、白蘿蔔、青瓜絲夠清甜，紅薑夠酸，素海蜇及素魚片夠煙韌，作為前菜就最啱啦！
材料：（4人分量）
芋頭、甘笋、紅薑、白蘿蔔、青瓜、素海蜇、素魚片、薄脆各4両及花生少許
製法：
1.將芋頭、甘笋、白蘿蔔、青瓜洗淨刨絲待用，紅薑切絲待用，薄脆炸脆待用。
2.素海蜇用少許鹽、五香粉及麻油醃製，再加入切碎的花生粒攪勻待用。
3.用少許鹽、五香粉將芋頭、甘笋、白蘿蔔、青瓜分別醃好。
4.芋頭炸脆，再與甘笋、白蘿蔔、青瓜、紅薑及薄脆同上碟，再加入素魚片撈勻同食。
呢款寶盒藏珍特別將香味十足嘅芋頭磨茸後，炸到面層脆一脆，內層軟腍腍，再喺中間加入煙韌素叉燒、鮮甜嘅甘笋同鮮菇、爽口嘅馬蹄同珍珠笋及鬆脆嘅腰果，食落好味之餘，睇落重好似一個寶盒裝滿珍寶放係枱咁，夠晒意頭。
材料：（4人分量）
芋頭1斤半
素叉燒、馬蹄、鮮菇、珍珠笋、甘笋、腰果各2両
製法：
1.芋頭蒸熟，磨成茸，加少許鹽、五香粉、生油、澄麫、粘米粉攪勻，做成水泡形，將之炸成金黃色待用。
2.腰果炸脆待用。馬蹄、甘笋洗淨去皮切片待用。素叉燒切片待用。鮮菇、珍珠笋洗淨待用。
3.起鑊落少許油，將馬蹄、甘笋、素叉燒、鮮菇、珍珠笋同炒，再加入少許生粉芡煮滾即可。
4.將煮好的馬蹄、甘笋、素叉燒、鮮菇、珍珠笋，倒落已炸好的芋頭圈中，以炸脆的粉絲及生菜、青瓜伴碟。