靚仔歌星陳冠希深受妹妹仔歡迎，可能同佢個樣生得鬼鬼哋有關，但係原來重有人唔識邊個係陳冠希！八方噚日同申訴專員戴婉瑩食晏，先至知佢個大仔今年已經二十歲嘞，𠵱家喺英國一間大學度讀緊經濟系，如無意外都就快畢業嘞！
專員講起有次佢有個朋友睇到佢個仔嘅相，就大大聲咁話佢個樣好似陳冠希呀，專員話當時自己一頭霧水，於是就喺度諗：「邊個係陳冠希呢？」然後搵張報紙出嚟睇先至知道。不過，專員又話覺得自己個仔靚仔啲喎。咁梗係啦！逢係做人阿媽嘅，都會覺得自己嘅仔女靚勻全城㗎啦！但係話時話，八方同啲行家睇咗專員個仔張靚相後，都忍唔住話：「好靚仔噃！掂喎！」加上專員話佢有六呎二吋咁高，八方話如果佢喺娛樂圈發展，相信都會迷死唔少妹妹仔！
E-mail：