每逢農曆年，馬圈嘅不成文規矩係馬主派利是畀馬房各色人等，通常係由阿頭（練馬師）代領，再派紅包畀班手足。大馬房有五十幾隻馬嘅，利是自然多啲；馬房細嘅，就睇餸食飯，無人埋怨。
馬主陳好多年前養過一隻馬，已經派過幾年利是畀自己馬房。有一年佢俾另外一個馬房猛咁Call，請佢派利是，佢一頭霧水，問清楚之後，先知道另一位馬主同名同姓，呢個馬房擺咗烏龍。
馬主N久有經驗，一早預定時辰入馬房，點知時辰未到，已收到阿頭電話，語氣幾溫和有禮喎。
馬主N話：「支票預備好嘞，記得嘅！」阿頭連聲多謝之餘，跟住歎一聲：「為班兄弟啫，你知啦，今年好似又曳咗一啲喎，我搵個兩個馬主，佢哋一聽見派利是，立即閃咗呀！」
派利是都閃，馬圈通縮何其嚴重也。問馬主N今年標準利是多少，佢話：「以往好景（九七前），點都一隻馬派八千啦，之後逐漸縮皮，聽講係一般三至五千；闊佬啲嘅，有馬贏，拉過頭馬嘅，就八千至一萬啦。」
原來馬房利是都係連續通縮三十七個月嘅犧牲品，馬主本身生意萎縮或者收入花紅減少（唔少馬主都係高級打工仔），自有難言之隱，派少啲利是亦無可厚非，總之世界不再美好，泡沫已經爆破，大家面對現實，調整吓心態至得！