應節美食：
東北地道團年飯味濃見稱

今日年三十，正要為團年飯埋頭苦幹，適逢禽流感襲港，正為無白切雞而煩惱？如果係咁，不如趁機舉家移師出外團年，食番餐特色又傳統的東北菜，雖然飽參翅肚欠奉，但其地道又好意頭的菜式，已令你感受到當地人的新年文化，同樣大魚大肉，味覺一新，絕不比廣東團年飯輸蝕！

記者：黃婉冰　
攝影：陳陶鈞　
ImageGirl：Natalie

六福大拼盤$148
六褔分別是滷水牛𦟌、哈爾濱紅腸、千層風、滷水豬手、粉皮、豆腐皮。哈爾濱紅腸以木碎煙熏過，由豬肉、香料、大蒜為主要材料，是出名的地道美食，另一種就是豆腐皮，以少許麻油、鹽、辣油、醋涼拌，千層風即一層層的豬耳，同樣以滷水汁浸過，以香脆見稱，食勻六褔，來年就多福多壽。

試味報告： 六款小食中以哈爾濱紅腸、豆腐皮最具地道風味，紅腸鹹得惹味，有好濃煙熏和香料味，送酒最好。豆腐皮煙煙韌韌，帶有麻油香，與粉皮蘸麻油醬食，味道各有不同。

大鍋燉酸菜$78
天寒地凍，東北人會用大鍋盛着自己醃製的酸菜、豬肉、由馬鈴薯粉做的粉條、用上湯燉熟，然後邊滾邊食，保持溫度，燉菜是當地的地道菜式之一，此烹調法更有保存蔬菜原來味道和營養的作用。

試味報告： 酸菜無廣東鹹酸菜咁鹹同酸，味道似酸椰菜，薯粉比粉絲稍粗，入口滑嘟嘟，湯清甜帶少少酸，好開胃，有豬肉吊一吊味，味道唔會寡。

打滷汁手幹麵$38
以麵或餃子代飯是當地人的傳統飲食習慣，而自製手幹麵便是其中一款，麵條用人手以木棍壓打，打滷汁是用番茄、木耳、雞蛋煮成的汁，淋在麵條上，汁量唔算多，但好有地道特色。

試味報告： 手幹麵入口滑溜，有啲近似日式的烏冬，配上打滷汁，味道酸酸甜甜，幾開胃，配料較齋，偏於清淡。

寶靈菌燒鹿肉$148
寶靈菌是冬天產於東北的菇菌，有補血作用，鹿肉則有保暖作用，是北方人寒天雪地下必食的野味，切片連同寶靈菌快速炒香，火候要控制得好，炒出來的鹿肉才可以保持鮮嫩，於冬天食最適合不過。

試味報告： 寶靈菌在香港好罕見，店主由東北購入，此菇味道較濃，且鮮鹿肉質感近似牛肉，但無牛肉咁多纖維，亦無羶味，食落同牛肉真係幾可亂真。

火龍魚$158（晚市） 記者推介
正所謂「年年有餘」，又點可以無魚？北方人喜歡以當地的黃魚炮製這味火龍魚，但貨源問題，大廚改用桂花魚，原條炸香配上甜酸汁，好戲尚在後頭，魚身淋上高粱酒點火，儼如一條火龍，特選此酒只因酒味唔會太強烈，否則便會將魚鮮味遮蓋。這道菜午市$138。

試味報告： 基本上與五柳魚差不多，精髓在於火燄將高粱酒蒸發，令魚肉滲出淡淡的酒香，酸甜汁調校得剛剛好，唔會過酸或過甜，味道較均勻，魚肉亦夠滑，唔會過乾。

Natalie：「呢度啲菜好有風味，味道都調校得幾好，好過年年都係食燒肉雞，比較新鮮囉。」

扒全肘$98 大廚推介
北方人叫豬手做肘，整隻豬手用冰糖、鹽、葱、花椒、八角、上湯燜上三個鐘，令豬手又腍又入味，燜過的豬手依然保持原整，成隻上枱，汁料盡收入豬肉內，汁水較少。食完豬手希望來年橫財就手。

試味報告： 豬手食落毫無肥膩感，豬手腍得輕輕撕開已經離晒骨，豬皮腍滑唔肥，豬肉非常入味，汁料濃香惹味，食到停唔到口。

David：「個扒全肘最好味，燜得夠腍唔嚡又入味，味道唔算太濃，最好係食完唔覺肥膩。」

顧師傅本身是北方人，當廚師亦有三十多年經驗，他表示北方人口味偏向濃味，而酸菜便是當地有名的地方菜，人們會將春天收成所得的蔬菜醃製，再留待冬天食用，所以又叫豐收菜。

店名：滿漢居
電話：29551120
地址：觀塘開源道64號源成中心2樓2號舖
座位：120個
營業時間：上午11時至晚上11時
付款方法：現金及信用卡（Visa,Master,AE,Diners）
備註：年初一收爐，初三啟市。