明日是馬年大年初一，過年的大日子，拜年、行花市、打麻雀、打機及睇戲等可謂指定節目，而部分本地體壇精英可以趁這幾天，放假稍為休息，與親朋好友開開心心，歡度幾日愉快假期，之後繼續努力，決心在馬年爭取更佳成績。
好去處：打麻雀
港聯因要準備嘉士伯盃賀歲足球賽，賽前賽後都要集宿，竹戰機會不大，但歐偉倫、丘建威、羅繼華及楊熙智幾位港聯華將抽空同各界拜個早年，祝各位「雀友」馬年齊齊發財。
歐偉倫：「自己平時比較少打麻雀，但過時過節放假，就會同家人或朋友細細地玩吓，贏輸冇乜所謂，最緊要大家開心！」
羅繼華：「唔識，所以好少打。」雖然「阿雞」聲言「唔識打」，卻在短短幾鋪贏了過百元。
楊熙智：「平時都有打，過節會約班隊友玩吓，但今年要準備賀歲波，相信就冇機會打啦。」
丘建威：「對打麻雀興趣唔大，過節間中會同家人玩吓。」
好去處：玩遊戲機
過年除咗踢賀歲波外，平時喺屋企多數會打機消磨時間。玩邊隻game？當然係足球gameWinningEleven啦，唔單止我一個玩，愉園入面朱仔（范俊業）同周昭（周昭雄）都係高手，我哋得閒就喺屋企操，一到有機會集宿時，就會帶齊架生入營玩餐飽。
好去處：行花市
一年一次，如果有時間我一定會去行花市。講開花市，最有印象就係九八年同冼家裕（前隊友）一班朋友，喺維園擺年宵攤檔賣毛公仔，記得每人夾二千蚊開檔，挨咗四個通宵最後連本帶利收番二千二，賺咗兩百蚊，雖然好少，但呢種經驗就好難得，下次有機會我都會再試。
好去處：睇電影
新年我多數留喺屋企，有時就一個人去睇戲，近排上演嘅《魔戒首部曲》就係我嘅心頭好，重買咗原著喺新年期間慢慢欣賞。
好去處：黃大仙拜神
以前小時候總會跟媽咪喺新年去黃大仙拜神，記得曾試過俾人用香燒着自己嘅棉襖；不過我好享受身處黃大仙嘅感覺。因為每個人都係帶住一個希望，感覺很好。
好去處：年初二睇煙花
喺農曆假期前完成咗Mock-exam（模擬考試），喺年初三出發去加拿大多倫多，同當地大學隊練習一星期，所以我希望把握僅餘嘅假期，喺年初二同朋友去灣仔海旁睇煙花同燈飾。