賭王何鴻燊千金何超瓊（Pansy），從來處理龐大業務與面對緋聞時都自有一番強者氣度。迎接新一年來臨，Pansy在其形容為「高姿態」的成功project--澳門旅遊塔內，在居高臨下的環境中，接受本報記者訪問，闡述她的事業雄心與抱負，更笑談她對利是的態度。
有人形容由何超瓊（Pansy）擔大旗統籌興建的澳門旅遊塔（MacauTower），是Pansy的「新寵」、「newtoy」，在這個標誌着澳門邁向國際化的高聳建築物內，Pansy充滿自信地大談她的過去與將來。
新年將至，Pansy表示新春會往外地數天，然後趕返澳門，她說：「因為澳門旅遊塔會有好多新春攤位，我想睇吓反應。」
而Pansy亦認為中國人過新年的習俗十分有意思，她說：「好似派利是咁，我細細個就好鍾意將每日𢭃到嘅利是計算吓。到𠵱家，我每過年就會派利是畀啲同事。利是嘅嘢，無論收同派都咁開心，我兩樣都咁鍾意。」
談及自己的事業，Pansy表示她在信德七年，愈來愈清楚自己的路向，她說：「初初爹哋叫我返信德幫手，頭幾年係適應期，摸索緊，做過啲乜嘢只有同事同自己知，外人根本睇唔到。但我從來冇洩氣，累積嘅經驗亦令我有好大嘅信念，要集合公司寶貴嘅歷史經驗，再配合與時並進嘅策略，邁向一個新嘅里程。」
除了賭業之外，Pansy在信德扮演的角色，是尋求公司業務多元化，她說：「澳門唔係淨係賭錢同燒炮仗，重有好多涉及旅遊業嘅發展空間。而興建呢個澳門旅遊塔，除咗希望可以促進澳門旅遊業外，從另一個角度睇，開放賭權，引入競爭，我哋嘅多元化配套，正正可以配合我爹哋嘅賭博生意。」
一直有指Pansy有興趣接棒父親的賭業，Pansy說：「我爹哋唔會喺呢個時候退落嚟！」
Pansy坦言享受繁忙高壓的工作量，她說：「作為名人第二代，我接管嘅生意算係大型產業，但亦希望自己有一番成績畀人睇，尤其係引入競爭後。而我知道自己嘅責任唔輕，每年公司公布業績時，我都好緊張，畢竟係反映自己嘅心血有冇成效。
「我好清楚自己經營公關公司，所以在公在私，都要保持一定程度嘅活躍，而且公關公司係我另一個心血，我唔會輕易放棄。」
至於感情生活，Pansy說：「我比較鍾意追求一啲實質嘅嘢，事業係我掌握得到嘅，我當然會瞓身，但係感情呢樣嘢，未必可以掌握得到嘅，我唔會有咁大期望。」
澳門旅遊塔會議展覽娛樂中心，去年年底正式開幕。這個屹立澳門市中心、高達三百三十八米，標誌着澳門邁向新紀元的建築物，總投資金額逾十億澳門幣（約九億七千萬港元）。
除了有觀光塔、三百六十度旋轉餐廳及一百八十度觀景酒廊外，澳門塔旁有先進的會議展覽中心，設施多元化。
正如Pansy所言，澳門塔落成，可以促進當地旅遊業，以及加速澳門國際化。」
採訪：RitaLeung、DebbieLum
攝影：EdwardChou、WongManShing
場地提供：澳門旅遊塔會議展覽娛樂中心