年三十晚屬一家團年之夜，飲飽食醉後的一大樂事，當然就係帶同一家大細到各大大小小嘅年宵市場買應節貨品同年花，不如就等小記同大家介紹吓港九新界三大必去年宵市場，並逐一解構場內必掃貨品，到場就算水洩不通都唔怕搵唔到心頭好啦！
記者：許穗齡、曾順珍
攝影：伍慶泉、楊錦文
維園精品最新最盞鬼
位於銅鑼灣的維園年宵市場，今年全場約有五百個攤檔，其中售賣乾貨檔位如玩具及賀年用品佔三百個，濕貨攤位有近二百個，屬全港最大型之年宵市場，而今年各大小攤檔所售賣的精品更是得意又好玩，而且大部分都係由檔主親自設計，不如等小記幫你介紹一吓！
第70號檔的一班年輕人，親自設計了一款布製的金元寶紙巾盒，的的骰骰又夠搶，難怪拍攝當日咁多市民買啦！
售價：$30
檔名：祈福村
檔號：70
吹氣玩具一向係年宵市場嘅主要售賣貨品，今年都有唔少新貨，好似呢款吹氣金元寶，就可以當獨立梳化咁坐，重有金色同黃色選擇，夠晒好意頭。
售價：$38
檔名：馬上有錢
檔號：255
挺董話題最近都具爭議性，小記唔係親董派，不過今年去年宵真係應該支持吓董伯伯，事關佢一身財神爺打扮，重時時保持四萬咁口，講緊嘅係放於保釣會嘅董伯伯紙牌公仔，只需$20就可以同佢來一張即影即有合照，兼支持吓保釣會。
價錢：$20
檔名：保釣行動委員會
檔號：30
今年所有有關馬嘅精品就一定最搶手，好似呢款布木偶，下半身好似雪糕筒咁，方便上面的馬仔布偶收藏，而只要扭動底部的竹枝，重可以控制佢活動，隨木偶附送四個有魔術貼的揮春，可以隨意貼在木偶身上，真正係好玩又應節。
售價：$20
檔名：幸運馬房
檔號：229-230
曾灶財一手書法未必稱得上靚，不過勝在甚有個人風格，一睇就知係佢嘅手筆，今次出揮春系列，都吸引到唔少市民嘅注意力。除咗揮春外，重有一款CD盒Size的月曆，當中插圖都係曾先生日常生活照，都幾搞鬼㗎！
售價：揮春$10兩張、揮春貼紙$10、月曆$28
檔名：曾灶財墨寶賀新歲
檔號：34
旺角花墟創意有活力
旺角花墟公園的年宵市場算是九龍區中最大，共有120個濕貨攤位及96個乾貨攤位，乾貨攤位售賣的貨品和遊戲不少還很有創意，好啱年輕朋友觀看和玩樂。加上在那兒開設攤位的，大都是年輕人，甚至中學生，所以四處都充滿朝氣和活力。
在乾貨場靠近熟食檔有個賣吹氣精品的攤位，老闆劉生原本是製衣商人，但憑周星馳套《少林足球》而引發靈感，設計了幾款吹氣頭盔、腳、樽等，模仿電影中的鐵頭功、黃金右腳、金剛腿和爆樽，都算幾搞笑。
爆樽售價：$20
檔名：笑人足球
檔號：23
如果想把經濟不景氣的寃屈發洩，不如到這個遊戲攤位掟波，用$20換來5個膠波，然後任你在三個外形酷似董伯伯的公仔中，選擇其中一個去掟，就算掟唔中，都會送番利是封，絕不空手而回。
檔名：掟膠波遊戲
檔號：68
元朗年宵鮮花品種夠特別
去到元朗的年宵市場，當然要參觀鮮花檔口，因為那兒的花檔賣的桔又多又靚，而且年花品種又特別，除傳統的桃花外，還有特別品種的海棠、小盆栽，甚至仙人掌，老人家和年輕人都啱口味。
這間叫靚女花店賣的多是小盆栽，不但品種別致，花色亦非常鮮豔，是以吸引不少在場人士觀看。老闆娘彭小姐是花場初哥，因為最近炒老闆魷魚，於是嘗試投花檔經營，期望可以發番個新年財。
檔名：靚女花店
檔號：13
今年海棠有新品種，就是以桃花花粉混入海棠花，令其變成粉和紅兩色。再加上其枝幹形狀彎曲有致，遠望就好像一幅圖畫一樣，非常美麗，無論你喜不喜歡海棠，都一定會被其深深吸引着。
售價：$1,500至$1,800
檔名：豐仔 檔號：90