由於大部分發展商都在農曆新年如常賣樓，地產代理不想得失「米飯班主」，所以亦要到場幫手兜客，美聯張錦成話響初一至初三會派出500名經紀以輪更方式做一手盤，至於分行就會響初一及二兩天休業。
中原陳永傑話人手數量由各區分行自行決定，估計最少都有200幾人。至於鴻運田國強估計初一及二兩天開工嘅夥計有50至100人，若多一手開新盤就只可以揀重點盤嚟做。
田國強又透露度歲回港後將公布公司未來一年的發展大計，包括拍賣投資業務同內地代理業務。
利嘉閣地產宣布委任黃浩才為拍賣部高級經理，負責拍賣、物業投資及大手物業招標等業務，黃生在行內已有8年拍賣物業經驗，經佢手售出的物業總值超過25億元，較矚目有99年的銅鑼灣白沙道地皮，成交價約5200萬元。
中原地產上月底宣布收購利達行九龍灣同荔枝角2家公司，事件竟令另外一家代理行帶來誤會，原來其中荔枝角嘅舖位本有4位股東，但已拆夥，當中3個股東合組利達行地產代理公司，重響同區開舖，咁啱兩日後就傳出中原收購利達行事件，搞到佢哋畀唔少客問係咪執笠。由於兩家公司都係用「利達行」呢個名，所以先有呢個誤會出現。
蘭西