以前比賽完場做訪問通常係球場邊，原來NBA興更衣室直擊訪問，完場後不論男女記者都湧入球員更衣室訪問，而班球員似乎已習以為常，氣定神閒地邊換衫沖涼邊接受訪問，如快艇前鋒邁亞斯只用一條毛巾遮住「要害」，就咁「赤裸裸」地接受訪問，認真有專業精神。
經過市中心商場，睇到幾個黑人逢人就細聲講『TICKETS』(有飛賣)，我就扮遊客上前問價，兩張明星隊練波加新秀賽中層波飛，叫價一百美元兩張，佢哋見我冇反應立即降到七十五蚊，我掉頭走時重話有得商量。當我到場後發現入座率只得六成，睇怕呢班黃牛都血本無歸。
明星三鬥三對抗賽，主持人逐一介紹球員登場時，湖人隊首先出場有魔術手莊遜同上屆WNBA的MVP妮絲莉出場，一個係NBA殿堂級巨星，一個人靚身材正嘅當紅女將，歡呼聲當然勁爆燈，但到費沙出場時，即刻噓聲四起，原來費沙係上年總決賽就係呢到助湖人打敗主隊76人奪標，球迷唔勁噓佢就奇。