如果沒計算錯誤的話，今天應該是大年三十。要出埠避年的相信已在周末走人，若然你尚在香港的話，應該是打算留港消費，與香港共同進退的一群。
老闆通常都會好識做，年三十的下午通常都不用上班，這段時候最好用嚟陪老媽子去作買年貨最後衝刺。已成為每年的規距，過年嗑的瓜子要到大埔去買、吃飯時百搭的海螺罐頭要到佐敦去買、包水餃用的麵粉要到九龍城去買、年花則要到旺角去買，就是這樣駕着車，塞來塞去，很快就到了吃團年飯的時候。
過年不出門，很大程度是為了這頓團年飯，自己因為在海外讀書時錯過了八頓團年飯，所以份外珍惜這個一家人聚首的日子。老媽子會準備足夠無數人吃的食物，夠膽食就夠膽有，雪櫃像是魔術箱，食極都有嘢食。另外，山東人習俗會在年三十晚包水餃，老媽子還特地會在幾個水餃內放入銀幣，誰吃到便會行大運，於是一家人便係咁咬水餃，小朋友亦咬個不亦樂乎，氣氛好得很。
吃完飯的必備節目是「賭」，打麻雀、擲骰仔、射龍門、魚蝦蟹、廿一點，冇大冇細，最緊要有現錢，冇賒冇欠，贏咗可以風騷，輸咗唔准發脾氣。
搭正十二點，看着肥姐與汪阿姐在電視倒數，然後向老媽子拜個年，祝老人家身體健康，兄弟姊妹互祝平安，派利是嘅派利是，𢭃利是嘅𢭃利是，然後一齊拆利是，又賭過。
先向大家拜個早年，祝大家一家人和和氣氣，身體健康，快樂！