蛇年響一片經濟不景、裁員、減薪及失業聲中宣布結束，對於一班從事汽車行業嘅朋友嚟講，響前景未明朗嘅情況下，經營都可謂相當慘淡，唔係減價就係送牌費、保險等優惠予買家；而車價嘅吸引程度，可以話重平過十年前嘅水平，真係諗起都得人驚。究竟蛇年嘅車壇，重有啲咩大事發生過呢？不如就趁今日年三十，一齊嚟回顧吓啦。
文：Mark哥
第一件要提嘅事，就係平治嘅減價行動喇；事關仁孚行為咗可以同坊間嘅水貨車行抗衡，於是索性將保養期由以往嘅三年改為一年，而另外兩年就變成Option，如此一來，代理訂定嘅新車就有好大減價空間。結果搞到一眾水貨商無啖好食，個個都話要劈價賣車；話時話，當行貨同水貨車嘅價錢好接近嗰陣，你又會點揀呢？
而第一宗代理權易手事件，就係勞斯萊斯同賓利一齊轉到大昌行旗下喇。但有趣嘅係，勞斯萊斯嘅代理權將由2002年起轉去森那美，即係寶馬嘅代理，不過有關方面並未正式向外公布。
講到車壇大事回顧，真係唔能夠唔提標緻，事關標緻響1999同2000年憑住206賣到開巷！估唔到去年206又憑住開篷嘅206CC依然食住個勢，跟住重有款307；不過最令人意外嘅係，標緻竟然響逆市裏面依然旺場非常，當中206CC同307，更加係賣到唔夠車交㖭，睇嚟佢哋班高層都飲得杯落喇！
之前提到代理權易手事件，一定唔可以唔講吓愛快；自去年Kingsway以旗下嘅嘉輪汽車取得愛快代理權後，愛快果然有番啲起色，全新147車系終於替愛快做番啲成績，最低限度班AlfaFans都義無反顧咁購買147作座駕，總算對得住新代理啩！
本來以為2001年，奧迪嘅氣勢會有所下滑，點知情況完全相反；香港代理唔止開咗獨立嘅維修中心AudiCentre，之後重不停引入新車，當中包括全世界最快嘅旅行車RS4，全新嘅S3、A6Multitronic及A4等車系，幾乎個個月都有一款新車在港推出，加上啲明星、名人個個都揸奧迪，咁你話有乜辦法唔有氣勢吖！
自Mini被寶馬收購後，新一代Mini經已正式面世；而香港代理亦於2001年中火速帶來新一代Mini供買家先睹為快，車價更由最便宜嘅十四萬幾起，亦同時繼2000年福士新版Beetle後，出現另一股搶購潮。結果係點？咪又係好似Beetle咁，訂咗之後有排都無車交囉！不過，同Beetle唔同嘅就係寶馬廠方好重視新Mini，要求香港代理學歐洲市場咁設獨立Showroom賣Mini，聽講呢個Showroom重好有可能會喺今年四月開幕㖭，各位Mini迷不妨拭目以待喇。
本來以為響去年推出嘅新Lancer，會為三菱一洗2000年嘅頹風；點知人算不如天算，到2001年年尾為止，屬大路嘅Lancer車系，喺去年嘅銷售成績唔係話太好。到11月嗰陣，當代理打算以全新Airtrek進軍市場，會有番啲成績嘅時候，點知兩個月加埋都唔知有無賣咗幾十架車。亞Mark真係希望佢哋喺馬年，能夠一洗近年嘅頹風，重振聲威啦。
唔係講笑！去年豐田代理皇冠車行一個唔聲唔聲，突然將批手波版Echo1.3減到$79,000起。嘩！都不知幾震撼呀！除賣咗好多車之餘，最慘重係其他對手，好似Demio咁都要迫住賣七萬幾；唔單止咁，新車都係賣七萬幾，咁搞法邊個買舊車呀？
光岡（Mitsuoka）有無人知係乜？之唔係日本嗰間專門將日產車系，改成老爺車款嘅日本車廠囉！佢哋嘅產品竟然喺去年被一位愛車之人做咗香港代理！唔係啩？咁冷門嘅車都有人夠膽攞個代理權嚟做？果然夠勇氣！不過此舉定能令香港嘅車市，會有一番新景象出現㗎。
響萬事得做咗唔少日子嘅LeonardCheng，響2001年結束前，毅然離開萬事得，轉投代理福特汽車嘅夏巴公司，出任營業部總經理一職，可以話係2001年最後一單車壇人事變動。