劉鑾雄（大劉）和女伴Yvonne於上周五出發去歐遊，遭七、八名在機場守候的記者拍下兩人的相片。大劉認為近年有人刻意洩露他的行蹤搞事，希望對方收手放過自己，不要再做小動作。
劉鑾雄（大劉）和九八年落選港姐、華置前員工Yvonne，於上周五（本月八日）出發去歐洲，據知當晚兩人去到機場禁區時，有七、八名一早在現場守候的記者影相，似乎早知兩人行蹤。
記者昨日就此事致電身在歐洲的大劉，他認為是有人刻意搞事，大劉說：「呢十個月嚟，有人冇停止過追殺我，包括洩露我兩個公司同事返港嘅行蹤（凌緣庭和Yvonne）畀某周刊、洩露我個仔結婚嘅消息，最近放料畀某周刊關於Yvonne嘅資料，同埋我今次去歐洲嘅行蹤，我經過長期嘅調查，已經證據確鑿，百分之一千肯定係同一個人做嘅。」
問大劉為何對方會這樣，他說：「我識嘅人之中，仇恨心最強係佢。但唔係個個好似佢咁，鍾意將自己嘅私隱同行蹤講畀身邊朋友同傳媒知㗎，佢鍾意將啲事實、半事實或者係自己幻想出嚟嘅嘢同記者講，話自己係貴族，實情鍾意做小動作，上網寫埋啲低莊嘅嘢。
「佢平時鍾意四圍電人，電完人又同人講話自己𠵱家嘅男朋友係世家子弟做醫生，某銀行家又追佢，某超級富豪所有嘅仔追佢、甚至城中公認最受歡迎鑽石中嘅鑽石王老五都追佢，一時喊住又同記者講話自己俾人鬧、俾人打、甚至俾人虐待嚟博同情，佢喺傳媒嘅勢力好龐大，因為佢最擅長講大話去收買記者。」
記者問傳聞中的多位當事人可知道此事，他說：「呢樣嘢我就唔知，不過鑽石中嘅鑽石王老五就一定會知，有人同我講，呢位鑽石中嘅鑽石王老五嘅公關主管都聽到呢位女主角周圍同人講，話佢老細想識佢同埋追佢。
「一個禮拜之前，我親自打過電話畀佢，求佢放過我，但佢話『你先至要放過我呀』，我覺得佢一定唔會放過我咯，佢想玩嘅遊戲𠵱家先至正式開始。」
問大劉如何解決此事，他說：「其實我已經忍咗佢幾年㗎啦！我都怕咗佢，我勢力又唔夠佢大，我只係弱小民族，萬一鑽石中嘅鑽石王老五搵佢做女朋友或者老婆，咁我咪直情要移民離開香港？不過一個人去到死梗嘅時候，都要局住做人性嘅還擊㗎啦！」
採訪：張止寒