讀者Jeff問：汽車本身嘅行車電腦是否可以更換呢？而本人嘅寶馬320iA，若唔想作任何機械改裝，又係咪只需要換掉行車電腦，就可以增強馬力輸出呢？
Jeff：唔想作任何機械改裝，只換掉行車電腦令輸出增多，就要視乎引擎本身嘅設計；一般自然吸氣引擎換掉行車電腦後，馬力只有約5%嘅增加，若然係渦輪增壓引擎，就有約30%嘅馬力增加。現時市面上所買到嘅改裝電腦，可分為高性能同賽車兩款，其中高性能係指引擎2000至3000轉以後，電油及空氣比例會有所改變，令引擎馬力和扭力線推後，而引擎頭段由於燃油噴注程式同原裝一樣，所以慢車時唔會有任何影響；不過，呢種道路用嘅高性能電腦，馬力及扭力增長唔會太大。至於賽車用嘅行車電腦，係注重榨取引擎尾段嘅馬力輸出，慢車行駛會因燃油噴注濃度過高，或會有死火同行車不暢順嘅情況出現。另外，賽車電腦亦要配合機件改裝，才可有完全發揮嘅機會。
而現時市面上買到嘅寶馬320iA改裝電腦，屬街道高性能型號，事前最好翻查該牌子電腦規格，而資料可在所屬網頁內找到；順帶一提部分奧迪1.8公升Turbo偈，會同時用於兩個車系上，但扭力及馬力輸出則各有不同；低號型嗰部只需換上行車電腦，便可發揮引擎高性能嘅一面。
如果大家對汽車有任何問題，可傳真或郵寄畀我哋，我哋會盡快為你解答。
傳真：27420542
郵寄：香港將軍澳工業邨西駿盈街八號《蘋果日報》副刊「車天車地」版「汽車Q&A」收。