仁昭一向都好服嗰啲享齊人之福嘅男人，好似趙世光咁，舊年聖誕俾人影到佢陪紅顏知己譚玉梅去睇戲，轉個頭除夕夜，就走去上海陪老婆何琍琍倒數。再過幾日，又俾人見到佢喺香港同譚玉梅「同車」，重去咗福臨門食飯。
農曆新年將至，馮仁昭早幾日又見到趙世光陪住喺上海返嚟香港嘅何琍琍，一齊去灣仔會展睇特技表演「寰球技影」首演，重遲到入場。佢兩公婆當日好似好和氣，笑住口咁入場睇騷。
梅花間竹咁應付兩個女人，趙生分配時間又真係幾平均噃！而譚玉梅日前同記者講，話會返去哈爾濱過年。咦，咁趙世光呢個農曆新年咪可以主力陪老婆囉！
腹大便便嘅榮文蔚，下個月就臨盆，逢親啲記者問佢知唔知腹中塊肉係仔定係女，佢梗係講：「重未知！」但馮仁昭就知道佢其實一早就走去照咗，而且重見到「慈菇椗」，即係生仔。
聽講佢同老公阮偉文不知幾開心，周圍同啲朋友報喜訊，你知啦，大家族好注重繼後香燈，榮文蔚一索得男，真係值得高興。不過，馮仁昭都係聽佢啲朋友講咋，照超聲波呢家嘢都唔係百分百準確，所以馮仁昭只係八到佢呢胎係生仔，唔係包生仔㗎。
有日馮仁昭個朋友喺Boffy嗰間ChinGSalon整頭髮，一入門口，就聽到坐喺最埋面嘅羅明珠講電話，諗唔到佢女人之家講嘢竟然可以成間髮型屋都聽到，盲嘅真係以為有人攞住個大聲公喺度製造噪音。
明珠搞到成間髮型屋啲客對佢眼超超，連坐喺佢隔籬嘅溫碧霞都怕咗佢，一個招呼都冇同佢打。而羅明珠講完個電話，重繼續大大聲喺度叫老闆Boffy贊助啲coupon畀佢朋友搞嘅聯歡晚會，不過Boffy都冇鬼理佢！
亞視前晚喺廣播道亞視總台錄影節目《百花齊放金曲夜》，請嚟陳麗斯、李惠敏、彭家麗、張立基等獻唱昔日首本名曲。節目喺夜晚八點開始，到十點左右，附近有居民報警投訴聲浪過大造成滋擾，結果警方到場，但因為重有二十分鐘就錄影完，警方亦畀亞視繼續做埋佢，亞視宣傳總監黎文卓話佢一早預咗會有人投訴，所以行定出門口睇吓有冇異樣。而行政總裁封小平就話小事一樁，唔想講。
噚日年廿九係任劍輝嘅生忌，佢嘅一班徒弟、老友好似陳寶珠、楊天經、梅雪詩、馮素波同呂良偉爸爸分別到白雪仙跑馬地寓所逸廬拜任姐，順便同仙姐食飯聚一聚。
任姐仙遊咁多年，佢哋成班人到𠵱家重咁有心，真係難得，佢哋噚日五點幾六點左右就開飯，當係一齊食團年飯，都幾開心。