今日年三十，先同讀者拜個早年，祝大家馬年股馬亨通，身體健康。
蛇年最後一日，趙飛雲回首望吓呢條係乜蛇？原來係虎頭蛇。蛇年首個交易日，港股紅盤高收16099，上個禮拜五恒指收市10518，就算今日港股識飛，半日市點去追五千幾點，重唔係虎頭蛇尾？
埋年計數，趙飛雲總算冇俾蛇咬到，執番多少。舊年11月6日開倉，至今3個月多啲，叫做跑贏恒生綜合指數，暫時唔使俾人炒魷魚。
蛇年諗唔到有邊隻股票贏得特別出色，但輸得幾慘烈都有一隻，就係中移動（941）。不過交咗學費之後都學到些少，就係炒中移動唔好太相信技術走勢，消息人士出句聲，張圖點靚點肉酸都冇用，係最難玩嘅大藍籌。
至於馬年股市，趙飛雲估計隻馬因為外圍及本港天氣轉冷，熱身唔夠會慢閘，不過跑順之後，年中之前會追番唔少失地，不過呢隻雖然係好馬，但練馬師公認唔夠班，寄望唔可以太大，能夠見到萬四點已經好叻。