李鵬忽然話去澳門，有人揣測同賭牌三分有關，以示中央對賭城新紀元的支持，鎮住個局。講起批賭牌，何厚鏵真係幾醒。十七個財團爭兩個牌（何鴻燊嗰個根本攞梗），中間幾多利益？但整個評選過程基本上冇差錯，亦冇醜聞，如期在農曆年前宣布。記得上個禮拜一有人傳佢會提前宣布中標結果，澳門政府馬上彈出嚟，承諾宣布前二十四小時通知傳媒，大家不必亂測。結果言而有信。咁先似個政府嘛。相比之下，香港真係笑死人，之前警務處處長人選遲遲唔公布、最近嘅沙田過海線投標拖完又拖。朱鎔基真係鬧得啱。
三個新賭場未來大興土木，投入以百億元計資金，以澳門經濟規模，咁嘅資金量一定能刺激當地經濟，前景好過香港好多。
E-mail：