由年頭捱到年尾，終於等到年卅晚，可以忘記繁重的工作唞一唞！若然大家仍未辦晒年貨的話，今日好多商場都會延長營業時間，讓各位作最後衝刺！其中以奧海城最值得推介，佢哋除咗有大型賀年布置外，重有20個室內年宵攤位，由賀年用品、家居用品、精品擺設，以至小食均有售賣，營業時間更到凌晨五時，大家絕對可以慢慢入貨！
記者：區佩嫦
攝影：謝耀恆
ImageGirl：Monique
鳴謝：滿清皇朝提供服裝
呢個售賣賀年擺設的攤檔，貨品有織錦的斜孭袋、賀年咕𠱸、金馬錢罌，甚至童裝賀年衫等，在一般市面都較為少見，全都屬中國貨，價錢抵之餘，質素重唔差㖭！
呢幾個「福祿壽」咕𠱸，每個都只有8吋闊，的的骰骰夠晒得意，攬上身都好舒服，一套三個售$30；另有一套四個的「如意吉祥」咕𠱸，夠晒好意頭，一套只售$38。（A8攤位）
囡囡未買賀年衫？呢件織錦背心相信必定合你心水，背心繡上各款的蝴蝶圖案，衫邊更綑上白色的毛毛，夠晒可愛，適合1歲至5歲的女童穿着，每件只售$29，非常抵買！（A8攤位）
另一個推介的攤位便是這個賣揮春、風車的攤位，除了有各款揮春外，當然唔少得每年必買的轉運風車，這些風車全以塑膠製成，款式夠多，有花卉、昆蟲作擺設外，還有七彩風車，約6吋的細風車只不過$10，8吋高的大風車則為$15，價錢夠抵，唔會好似戶外年宵咁開天索價。（A9攤位）
新年總有新願望，去到奧海城可以祈福兼做善事，只要在場內捐$5或以上予香港幼兒教育及服務聯會，便可以擊祈福鼓一次，讓你今年運氣更佳。
地點：奧海城二期北翼中庭
營業時間：10:00am-5:00am
地址：西九龍海亭道18號
蛇年經濟咁差，馬年梗係想過得好啲，不如沾染福、祿、壽三星的福氣及財氣吧！青衣城今年便豎立了三個Q版的福祿壽，個個都成層樓咁高，最緊要係佢哋三位嘅前面都有大量金銀珠寶，睇都睇得特別開心。
想來年好運，不如在場內買個福袋增添自己及家人的福氣，價值$100的福袋，內有參茸、紅酒、餐券等，總值超過$100，意頭好之餘又夠超值。
地點：青衣城
營業時間：10:00am-11:00pm
地址：青衣機鐵站上蓋
傳統的農曆新年加入西方的色彩會係點？東薈城將以中西合璧的繪畫布置迎接馬年的來臨。商場特別請了澳洲美術大師KevinPierce手繪了超過30幅的大型繪畫，並掛於商場的每個角落，全部繪畫的靈感均取自傳統中國農村的新年景象，結合民間繪畫的筆觸，再加上大膽的用色，有別於一般的傳統布置。
地點：東薈城
營業時間：9:00am-12:00mn
地址：大嶼山東涌達東路20號