今日對費城以至全美國嘅佐敦FANS，或者波鞋收藏家嚟講係個大日子，因為AirJordan第十七代球鞋今日正式在北美推出（重遲過香港！），所以我晨早到市中心嘅波鞋舖搵下料，點知鬼影都冇隻。
好彩臨走時發現兩對同屬NIKE嘅明星賽特別版波鞋──鞋到人冇到嘅卡達全紅色彈弓鞋，搶眼度十足，但盛惠一百四十美金，另一對費城獨有嘅紅白藍AirForce，紀念性十足，盛惠六十五蚊，兩對加埋先二百零五蚊，比一對新AirJordan只係貴五蚊，精明消費者的你會揀邊隊呢？
對於我這個習慣在修頓街場近距離睇波嘅人嚟講，今日睇新秀對抗賽可謂大開眼界，坐係比香港紅館八十蚊飛仲要高幾層嘅超級山頂位睇波，班球員細到好似隻蟻咁，真係高處不勝寒，怪唔知得台底有副望遠鏡。
今晚威到盡嘅勇士的李察臣可謂突然萬般寵愛在一身，係前日嘅記招備受冷落，但今日ESPN、NBA等電視台都爭住訪問佢，不過佢冇囂張之餘仲好有禮貌，連幫我影張拜年相都冇托手肘，祝佢第日大紅大紫啦！
圖?文：本報記者盧漢傑費城直擊