大律師公會主席梁家傑一想到特首董建華連任後的法治情況，坦言表達出擔憂：「釋法係一次不幸事件，特區政府、司法機構同中央政府都係輸家，我唔希望不幸事件喺制訂《基本法》第二十三條時重演，否則對法治嘅衝擊會比釋法更嚴重！」
梁家傑早前接受本報訪問時表示，預期董建華連任後會就《基本法》第二十三條有關叛國、煽動叛亂、顛覆等罪名制訂法例，而有關立法會將「所有基本人權、自由等概念，一次過抽晒出嚟。」
他指出，九九年人大釋法是基於《基本法》有關居港權的條文不清晰所致，而《基本法》第二十三條立法更會「將兩制同一國嘅矛盾全部凸顯出嚟」。梁家傑最大的擔憂，是在立法過程中有人置「一國」法理高於「兩制」。他說：「有人會將內地法理思維放在香港，咁可大可小；一講到咁，我哋隨時會俾人無限上綱，話我哋唔了解中國，淨係講『兩制』，唔顧『一國』。」他擔心會重演九八年爭拗釋法問題時，將法理問題化為政治問題的對立情況。
性格直率的梁家傑坦言：「我成日強調，我哋梗係講『兩制』啦，因為『一國』根本唔使講，你𠵱家周圍見到五星旗，梗係『一國』啦，『一國兩制』嘅概念刁鑽之處就係『兩制』嘛！」
他亦不諱言自己不信任中央：「有啲人懶尖銳咁問，你係咪以前信英國，𠵱家唔信中國佬呀？喂，咁係好易明白，『一國兩制』嘅構想，就係講得好直截了當，係基於一個唔信任，呢個係冇得避。」
釋法風波鬧得最激烈之時，大律師公會仍是湯家驊「擔大旗」的年代，梁家傑當時是公會副主席，前事之師，他希望當局就《基本法》第二十三條諮詢公眾時會充分諮詢，並加強中港兩地法律界及法律學者交流，以避免重演釋法的悲劇。
記者：王惠芳