上個禮拜四，阿董以特首身分出席立法會答問大會，八方初時以為屆時又會上演一場民主派與老董唇槍舌劍的戲肉，點知一開場，八方都未坐定，老董已先發制人，教訓民主派淨係識鬧人，老馬有火咁嘅款。
八方一睇，完全唔似佢老人家平時作風，當然要四方打聽，經追查下，原來阿董身邊嘅智囊點條高危嘅路畀佢行，話佢成日都係一個老好人嘅形象，冇乜性格，重俾人話婆婆媽媽，𠵱家見民望不斷有進帳，自然要食住個勢，建立番一個強勢領導嘅形象。
但香港地，所謂家和萬事興，一開口就鬧人似乎唔多有領袖風範，加上佢話四面受敵，即係路線正確的歪道理並不討好，唔怪得有啲高官私下都話特首今次表演有得分也有失分。
老董喺答問大會上直罵民主派搶晒風頭，佢猛話想講房屋問題，重特登問專長房屋事務嘅馮檢基去咗邊，唔見佢真係唔抵。係呢，咁馮檢基當時去咗邊呢？KK原來去咗同街坊寫揮春，佢話既然問咗兩次問題，都無機會再問，咁咪唔去答問大會囉。
KK講笑，董生呢一幕直頭係「江握手」嘅翻版，董生要眾裏尋「他」，皆因要搵佢繼任房屋部部長噃。諗一諗，董生要實行高官問責制，房屋部部長都算係難搵人選，黃星華又到期收工，另謀高手唔容易。
E-mail：