大年三十晚都有兩隻新股掛牌上市，包括有慕詩國際（130）同埋第一天然食品（1076），雖然慕詩招股反應相當唔錯，但經紀陳就睇好第一天然食品，話後者炒得成嘅機會高。
小初唔多明，賣衫嘅慕詩英文名叫「莫sell」，即係叫你唔好沽咁解，咁都冇得炒？小初講笑啫。
慕詩發行7000萬股新股，其中90%配售，餘下10%公開發售，每股作價1元，集資7000萬元。慕詩公開發售同埋配售，分別有超額認購5.6倍及5.7倍。不過，經紀陳話隻股冇莊家睇場，可能冇得炒。
至於第一天然食品，以每股73仙，發行2億股新股，集資1.46億元。公開認購部分唔夠1倍認購，配售則淨係話足額，睇落唔似好受歡迎。不過經紀陳話根本就冇咩貨散出街，所以先至有得諗。
佢又話第一日雖然未必會出現勁炒局面，但係稍後可能有意外驚喜都唔定。