陳文媛前晚往維園行年宵市場，都說是靚女有着數，她只花八元，便可買到一支原價十元的財神筆，還附送一條吹氣大鯉魚。陳文媛又買了一個風車，希望把蛇年的緋聞轉走。
陳文媛（BoBo）前日與新城電台《聯Fan所》的兩位主持伍加皮及李國能，結伴到銅鑼灣維園年宵市場購賀年物品。BoBo更即席發揮其師奶仔本色，與各攤檔的檔販討價還價，結果收穫甚豐。
在眾多的賀年物品中，BoBo分別買了一個手搖鼓、一支刻有財神的筆及風車。她笑說：「其實我買風車嘅原因，係希望轉走晒啲緋聞。其他嘅嘢就唔使轉啦，因為我蛇年嘅運程都好好。」
BoBo又表示，年三十晚不會再行花市，因為她一向怕到多人的地方。她說：「我今日好開心可以嚟行花市，一來可以寓工作於娛樂，二來好多攤檔嘅老闆都好好人。我同佢哋講價，佢哋都肯平啲賣畀我，有啲重送禮物畀我。好似頭先我只係用八蚊買咗一支原價十蚊嘅財神筆，嗰個檔販居然送咗一條吹氣嘅大鯉魚畀我呀。」
BoBo透露過往亦有競投年宵攤位，但由於今年經濟不景，加上自己忙於工作，所以今年打消了此念頭。她說：「如果有機會再畀我搞年宵攤位嘅話，我會賣啲自己設計嘅袋仔。到時我可能會搵埋何韻詩幫手，不過我淨係會畀佢負責叫賣嗰一part，因為佢講嘢夠晒大聲。」
採訪：李珮洳
攝影：陳偉權