每年農曆新年，香港電台節目《時事沙龍》都會搵班政黨上去點吓歌，搞吓天才表演，同香港市民拜年，昨日港台就特別為呢個節目錄音，雖然今年只有民主黨、自由黨、前綫同民協，但係一樣玩得熱熱鬧鬧，每個政黨重一次過可以點三首歌！
今次港台要四個政黨分別以「送給港人?特首」、「送給海外人士」同「自由選擇」三個環節去點歌（見表），當中梗唔少得最近忙緊競選連任嘅董特首啦！前綫送咗首《Shallwetalk》畀老董，梁耀忠說老董話就話想同民主派和市民溝通，但事實係董生同佢哋冇乜偈傾，所以佢希望新一年大家真係可以有傾有講。至於民主黨涂謹申同黃成智，就點咗首《海闊天空》畀喺海外為爭取民主而奮鬥嘅人，阿智話希望爭取民運人士可以好似歌詞咁講，就算有乜困難都可以克服。
而講到最抵死嘅都非民協莫屬，佢哋竟然點首《爛泥》送畀香港政黨，唔通想話香港政黨係爛泥？點知民協主席馮檢基即刻解畫，話大家要睇埋歌詞先，歌詞係話願意化成爛泥去栽蓮花，就好似政黨願意栽培其他人一樣，好彩得佢解一解畫，否則重會以為佢係鬧緊𠵱家啲政黨爛泥扶唔上壁㖭！
E-mail：