近期菓子玩具非常大熱，計有迪士尼卡通人物、恐龍及鐵人28號等畀Fans追捧外，最新由Furuta出品嘅《20世紀漫畫家篇第3輯》之「松本零士之世界」，就推出經典動畫《宇宙海盜夏羅古》嘅菓子玩具。雖然造工相當不俗，但由於特別隱藏版太多，相信Fans好難儲得齊，所以好多Fans寧願集齊普通7種就算數！
記者：梁煒健
攝影：楊錦文
Furuta廠已經推出兩輯「20世紀漫畫家」菓子玩具，先後有永井豪及橫山光輝筆下嘅經典動畫人物。今次第3輯選咗松本零士呢位名畫家最經典嘅作品《宇宙海盜夏羅古》作主題，Size更大至有5吋半高。著名造型師安藤賢司作原型製作總指揮，手工及造型毋庸置疑非常正斗，其中主角夏羅古、鐵郎、美達露及其宇宙戰艦愛干達號，造型最有原著神采，上色並冇馬虎。只可惜呢套菓子玩具太多特別版，例如夏羅古嘅手槍竟有十多種（只係編號唔同外形一樣），而配角鐵郎亦有多種面貌，想集齊確係唔Easy，所以小記只勸大家，儲一套全7種嘅普通版就算嘞，除非你係個超級Fans非儲齊不可就另當別論。