以往每逢到呢個時候，做股票行嘅行家都會特別開心，皆因大多數證券行嘅慣例係喺農曆年底派發雙糧同花紅，而且更會請全公司員工食餐晚飯當係團年。
不過今年嘅情況就可以話完全唔同晒，好多股票行唔單止取消派發雙糧同花紅，有啲更為咗縮減成本，專登將團年飯都改喺新年後同春茗酒一齊食，實行慳得幾多得幾多，以往年尾中環區酒樓晚市專做股票行團年飯生意嘅光景已不復再。
有晚韋衡同幾個行家一齊去其中一間酒家食晚飯，坐足成晚都未坐滿客，情況就好似中環區星期日早市咁靜。照睇落去可能會有啲中環區嘅酒樓捱唔住，喺農曆年後關門大吉，到時行家要聚腳可能又會少咗啲地方。
講起當晚，有個行家話個市跌到𠵱家呢個水平，都唔知會點走，上又唔係落又唔係，投資者根本唔敢亂入市，搞到全行臨年尾重係無啖好食。
不過另一個行家就唔係好同意，據佢講，某間股票行嘅經紀生意就唔錯，事關該間股票行有幸成為某大窩輪發行商嘅御用莊家，發行商為咗吸引投資者炒佢哋啲輪，於是同該股票行定個協議，話佢哋所發行嘅窩輪，若由該莊家做嘅成交都可以有佣金回贈。
間股票行為咗吸引多啲客嚟買貨，甚至向啲客講明買邊幾隻窩輪唔收佣金，有部分經紀為咗鼓勵啲客走多幾轉，暗地裏更同啲客拆佣，加埋又唔使畀印花稅，啲客計過如果同價出入都有着數。
結果該股票行嘅牌喺嗰隻輪個板掛到滿晒，韋衡恍然大悟，唔怪得過去一個禮拜啲輪嘅成交額無點跌到。