佘詩曼（阿佘）已被無綫欽點為今年力捧花旦之一，但阿佘日前接受記者專訪時，卻大讚頭號花旦宣萱夠自然，新紮姐仔廖碧兒贏性感，郭羨妮則口才好。反而阿佘認為自己天生一把雞仔聲和嬌滴滴外形，成為她的致命傷。
阿佘對於自己非常了解，她說：「我覺得自己有觀眾緣，有好多機會，可能係我拍過嘅男主角都幾多，喺佢哋身上學到佢哋嘅長處，但我覺得自己唔夠高，把聲同個樣太嬌滴滴，局限咗發揮，好多類型嘅角色，重未有人敢搵我做，如果好似Flora（陳慧珊）咁就好有型啦。」
阿佘說：「郭羨妮口才好好，做司儀一流，佢宜古宜今，俾人感覺大方得體。佢拍《尋秦記》時，要去到北京拍外景咁辛苦，但都冇影響狀態同表現，演技重好好，真係好叻。」
阿佘跟廖碧兒從來未合作過，但她覺得廖碧兒相當性感，阿佘說：「我覺得佢好friendly，好nice，我有睇過《皆大歡喜》，雖然佢嘅中文唔係講得好正，但表現OK，同埋佢靚囉，身形好，佢好sexy呀。」
阿佘說：「宣萱係前輩，佢做時裝劇好自然，雖然佢話拍古裝劇《洗冤錄》嗰陣嘅造型好核突，但我覺得OK喎，佢喺《尋秦記》嘅古裝造型都好靚。宣萱係我欣賞嘅其中一個性格演員，冇乜緋聞，形象健康，佢成日哈哈笑，啲人會鍾意。」
撰文：朱芷瑩
攝影：陳志嵐
協力：羅慧敏
服裝提供：SisterMoonBaboon