馬詩慧（Janet）亦認同丈夫王敏德所言，夫婦相處最重視溝通，她說：「兩個人相處溝通係好重要，但我覺得容忍都好重要。因為兩個人喺唔同嘅環境長大同生活，結婚先一齊，所以遇到啲乜嘢問題，一定唔可以收埋喺個心度。
「記得以前，我哋新婚時真係好多拗撬，之後明白到有問題就要解決，當問題一旦積壓到爆發，就會一發不可收拾。
「𠵱家我學曉大事化小，小事化無，我主張有乜嘢問題都開家庭會議，大家拎出嚟講，無論我、Michael，抑或三個仔女，佢哋邊個都有投票同發言權，小朋友都應該可以發表自己嘅主見，寧願大家慢慢傾，唔啱講到啱。」
好男人如Michael，亦難逃緋聞的魔掌，Janet表示她處理的方法，絕對不會是大興問罪之師。
Janet說：「我嘅處理方法係要對老公信任，講真身為女人，我對呢啲事好敏感，基本上件事真與假，我憑第六感就會知道。而且Michael喺呢個圈一段日子，我會知道有啲事情係渲染。我唔會一百零一信佢，百分之一百相信已經好足夠。」
而在教育子女方面，Janet自言十分嚴格，她說：「我對仔女嘅行為同學業都好重視，小朋友應該培養佢哋工作時工作，遊戲時遊戲，一定唔可以心散，佢哋都要知道自己有自己嘅責任。」