中國隊噚日大軍壓境，雖然冇乜球迷入機場歡迎，不過在大批傳媒追訪下，場面尚算熱鬧。機管局在歲晚原本搵咗個財神，向到港旅客派發利是；不過呢個財神一見中國隊，就即刻放低工作周圍搵中國球員合照，可惜呢班中國隊成員較生面口，財神大佬最後只能搵見慣見熟嘅馬明宇合照。
唔知係咪俾傳媒話操練「虎頭蛇尾」關係，噚日中國隊返到酒店休息唔夠一粒鐘，全隊即刻殺入體院練習。原本足總安排場地由五點至六點，以為長途跋涉來港嘅中國隊只會輕抒腳頭，點知佢哋熱身後即刻打分隊賽，一練個半小時，最後重因為超時而被體院職員趕走。
港聯哥連斯噚日捱義氣揸車載基夫入體院操練，不過，佢就因為違反交通規例俾差人抄牌，呢位尼日利亞外援為咗慳番張牛肉乾，同阿sir嘈咗成粒鐘，最後當然四百五十蚊走唔甩，最慘就係連操練亦遲大到，累埋基夫一齊俾教練罰跑圈。