啲人成日話政客最叻馬後炮，民建聯噚日就唔只發馬後炮，重係烏龍馬後炮。話說九鐵新主席田北辰上個禮拜一喺立法會主動宣布考慮取消原定四月嘅加價，贏到唔少掌聲，搞到地鐵為咗唔想成為箭靶，嗱嗱臨喺禮拜四晚就搶先宣布今年內都唔加價，點知到噚日朝早各新聞機構都收到民建聯嘅新聞稿，話要求地鐵公司擱置加價，同市民共度時艱云云……，呢啲說話原本好啱，可惜遲咗兩日。
負責發稿嘅民建聯深水埗支部主席黃尉聰解釋，原本上禮拜初已經計劃噚日去地鐵請願，點知地鐵突然宣布取消加價，佢哋臨時決定取消請願，但佢啲同事一時搞錯，噚日照原定計劃發新聞稿出去，結果變成請錯願。
E-mail：