收到美國商會嘅通知，三月十六日星期六在會展中心舉行周年舞會，話明係拉丁式超級豪華，訂票欲購從速。本來想去訂番四張飛去見識一吓嘅，但睇真吓啲價錢，嘩，一圍枱十二人要二萬一千元，一張入場券要一千七百五十元，真係貴到飛起，一圍枱費用（未計當晚飲紅酒）超過最近香港電台請APO（助理節目主任）嘅一個月薪水（一萬九千元），唔係幾好意思噃，都係慳番好過。
啲美國佬可能好有錢，自問冇得比，無謂充大頭。反而同日收到禮頓道Latata法國餐廳嘅新春菜式，重可以諗吓。Latata老闆強哥仔話明：「三款菜式，謹供參考，更可為貴客度身訂造餐單，全法式或意式晚宴，全不含味精，中法名廚攜手，一切以品質為先。」
三款菜式有法國式頭盤、法式六小碟、蛇羹或燉翅、杞子雞、法式羊扒、牛扒或燒乳鴿、蒸蘇眉、燉燕窩及法式甜品，價錢就由每席（十二人）二千九百八十八元起至最貴嘅七千八百八十八元，食兩圍最貴嘅加靚紅酒，仍然唔使二萬一千元，而且會展中心啲菜式，工場式大規模製作，點同Latata比呀！
強哥仔話呢三款係「新春中法團年私房菜」，絕對係酬賓價錢，左丁山當然信佢，但係又心思思，好奇心起，想去睇吓美國商會有乜把炮，夠膽在艱難時刻每客收一千七百五十元！