上星期同大家講過，第一水嘅《不速之嚇》DVD碟，出現字幕唔夾口形嘅情況，不過今個星期新出嘅《不速之嚇》新版，就完全改正番以上所講嘅問題。
至於分辨第一水「錯」版同第二水「正」版嘅方法，其實非常簡單，大家只要留意盒面有一張圓形嘅貼紙，就一定係第二水嘅「正」版，大家唔好買錯呀！
另外，喺度想提醒一下大家，新出嗰隻《最後一強》，𠵱家玩緊東芝DVD機大抽獎，而抽獎標貼（即係一張圓形貼紙），就印咗喺盒面，大家買碟時一定要留意有冇俾人抽起咗呀！
文：睇碟王
DVD必買榜
今個星期最好賣當然係李連杰套《最後一強》啦！DVD舖老闆話，啲人入到嚟買碟，唔理買乜碟都好，喺畀錢時都會連埋隻《最後一強》一齊入貨，如果有錢少少嘅，就會加多隻《遊園驚夢》或者《贖命密碼》。
至於新碟方面，一套由奇洛李維斯主演，專講打棒球嘅《Hardball》都意外地好賣，果然係靚仔多Fans呀！另外重有一隻《阿里》，呢套係拳王阿里嘅真人紀錄片，裏面講述咗阿里嘅一生，都同樣好賣。
文：睇碟王
本周最好賣DVD排名榜
第一位 《最後一強》 三區
第二位 《不速之嚇》 三區
第三位 《贖命密碼》 一區
第四位 《Hardball》（暫未有中文譯名） 一區
第五位 《阿里》(ALIThroughTheEyesOfTheWorld) 一區