《時事沙龍》新年版除咗有點唱環節之外，重例牌有天才表演同美食示範，八方重記得舊年前綫何秀蘭一招「混醬多士」技驚全場，八方重以為今次阿蘭怕且都係整「滾蛋」，點知佢今次唔搞倒董搞溫情，搞「寒冬送暖熱飲」！
今次阿蘭嘅「寒冬送暖熱飲」，其實包括四種飲品，第一種叫「愛心熱飲」，用好立克加紅棗，取其香港可以早啲立刻變好！第二種叫「杞子圓肉茶」，佢話最近香港成日有家庭慘案，重傷及子女，呢杯茶係提醒佢哋子女係「己子」（杞子）同自己骨肉（圓肉），唔好亂咁傷害！
第三種其實係滾水蛋，但阿蘭取名叫「水乳交融」，希望社會不同意見可以交融到，最後一樣叫「薑汁檸蜜」，呢樣係因為老董唔夠「薑」見民主派，不斷畀檸檬佢哋食，所以就整咗呢個「薑汁檸蜜」！究竟好唔好飲八方唔知，但就知道全場只得涂謹申同黃成智敢試飲！
（圖）阿蘭咁用心機煮茶，點知馮檢基（左）最後都冇領到情。
E-mail：