過春節的街市，分外有氣氛。
在師奶年晚四出格價辦年貨的隊伍中，覺得自己雖然不算正路師奶，但好歹是街市擁躉，行出來，不會太礙眼；甚至捧住大包細包年貨，幾似樣。當師奶問哪裏的蘿蔔糕好吃，我以特攻隊卧底的方式搭嘴，告以「八珍」老牌醬園的，用有機蘿蔔炮製，所以最好賣。師奶收到風，報以稱許眼色，我頓覺成功跳級，擺脫業餘形象。
我光顧的是傳統街市檔攤，跟愛燒飯的朋友講起，亦有相同選擇。超市也不壞，是下雨天的好去處，免得在濕滑的街市跣腳。可惜中區仍未有24小時營業的超市，兩大集團的旗艦辦公室全在中區，偏偏歧視中環人的反常購物需要，可惡。
街市是特殊社區，人人有故事。我逛街市時通常烚吓烚吓，見到古靈精怪產品即兩眼放光，勇於嘗試。我想，這是我受檔主歡迎的原因。他們叫我靚女，我唔該冇句，欣然接受。
雖然我厚臉皮，但遇上到同一個街市買菜的靚佬，我不敢造次，暗中跟蹤，偷看他的口味。街市靚佬買慣菜，有功架，肯定是廚神。看那一籃子鮮色佳餚便羨慕他的女伴。
我終於抵不住，冒昧上前問對方的名字。他答Apple。嘩，男人叫Apple，真巧啊，我叫Daily！我們可以天天見報做新聞男女主角。就算男人尷尬答：我叫粉腸。我也觸電，因為我一直想改名叫自己做碌葛。兩種滋陰湯料一滾埋，和味到你唔信！