後日就係大年初一，未辦年貨嘅好把握剩低嘅兩日時間，而重未買賀年花而又唔想聽日同人迫餐死嘅話，不妨趁今日周日提早入定貨。傳統中國新年，自然唔少得傳統賀年花──桃花及桔。究竟桃花要點至為之靚？桔又要點揀呢？就等從事花農十多年經驗嘅李生一一話畀大家知。而李生重話今年嘅桃花同桔價格都無乜漲價，大可以放心入貨。
記者：陳冰麗
攝影：楊錦文、陳盛臣
鳴謝：瓊苑園藝有限公司
地址：九龍花墟道34號地下 電話：26579113
1.花蕾要多：開花後至夠燦爛。
2.花蕾由底部開起：一般桃花開花層次應由底部開起再向上伸延，若花蕾以不規則左爆右爆就唔多靚。
3.枝幹潤滑色淺：皮光枝幹潤滑係健康桃花嘅特徵，粗幼不成問題，但色太深或凹凸不平則不宜買。
4.花蕾有距離：花蕾之間最好相距兩吋左右，當桃花開花時至唔會因太密而無空間畀佢繼續開花。
桃花有大細棵之分，大棵有3呎高，$300左右；最大桃花王成20呎高，$30,000以上；細棵嘅盆栽桃花比較啱住家擺放，每棵大概只2呎高，只售$88。
盆栽桃花只要每日淋一杯水已足夠；而大桃花係浸住水，大概兩至三日換水一次，每次換水要保留3舊水再加新嘅水。