英皇今年力捧嘅碩士新人、清洪大狀契仔周英傑（Bernard），日前喺銅鑼灣一間家具店拍新歌《敢愛敢還》MV。而女主角就係英皇嘅新女，今年二十歲嘅Yumiko鄭雅文。
Bernard趁未埋位，用張紙寫咗幾條雞腸（英文）畀個保母，原來佢知個保母病咗，於是幫個保母開藥，叫佢去藥房執藥食。
有專業藥劑師牌嘅Bernard同馮仁昭講，佢已經十年冇睇過醫生，一來因身體幾好，二來讀過藥劑科，所以成日都識得自己製藥，好似消炎藥、眼藥水，就連便秘用嘅甘油條都識得整。
馮仁昭最想知嘅梗係佢隻Bernard牌甘油條使唔使得，點知Bernard話能醫不自醫，好少用番自製藥，佢話最多都係用自製消炎水嚟搽暗瘡，遇上有病，自己就去藥房執啲西藥食，所以佢誇口話十年冇睇過醫生就係咁解。
最近有周刊話陳妙瑛同玩具大王蔡志明、黎姿等一齊蒲吧，而陳妙瑛更加飲到不省人事，要人扶離場。但雜誌入面影到個女仔，用頭髮遮住咗個樣，根本就睇唔清楚係邊個。
陳妙瑛同馮仁昭講話相入面嗰個人根本就唔係佢，雖然佢好嬲，但唔想幫本雜誌宣傳，所以費事澄清。但呢幾日有好多朋友打電話畀陳妙瑛，問佢做乜事飲醉酒，佢覺得好影響自己做生意嘅形象，所以噚日專登開記者會澄清件事。
周秀蘭噚日喺銅鑼灣維園嘅年宵市場開檔，賣佢嗰間齋舖「寶光素食」嘅糕點，佢話：「呢個攤檔我拎咗約五萬蚊出嚟搞，我希望可以有咁多錢賺咁多錢。」
周秀蘭噚日看檔，有市民嚟檔口幫襯，身為老闆娘嘅佢，梗係熱情招呼。問周秀蘭有冇出雙糧畀啲員工，佢話：「冇出雙糧，但我有分花紅畀啲員工，等佢哋過年都開心啲。」
方力申嘅新唱片《一周年》噚日啱啱出街，佢話好希望有好成績。而新唱片嘅封套係方力申踩單車嘅相，有「飛魚王子」之稱嘅方力申，原來唔多識踩單車，為咗拍呢輯相，佢即時去學，結果學咗幾粒鐘就學識咗，佢重話：「好好玩，我重學人哋踩花式㖭，唔知幾勁呀！」方力申運動細胞果然強勁，一學就上手。
王秀琳（Mango）前日考車牌肥佬，噚日佢幫新城電台節目錄音時同記者講話覺得好唔抵，佢話最衰前面架貨車突然溜後，搞到佢爭啲撞車。
Mango重話本來考到車牌嘅話，就有車行送架車畀佢，佢之前連車款都揀埋，問Mango係邊間車行？佢又唔肯講，只係話四月會再考牌喎。