今日係年廿八，重有唔夠幾日就到農曆新年！又係難得聚首一堂嘅時候，既然咁人齊，梗係要搵啲PartyGame嚟招呼吓親戚好友啦！但係到底有啲乜嘢Game，會冇色情、冇暴力，可以大人細路哥齊齊玩嘅呢？以下就精選咗幾隻家用主機嘅好Game俾大家參考，等大家唔怕會撞板之餘，又可以玩得開開心心！
文：藍顯傑
攝影：陳盛辰
雖然嚟緊嘅農曆新年，冇話好似上年咁，適逢有《鬼武者》呢啲咁嘅大Game推出，但係啲GameShop都好識做，大部分都只係休年初一、初二兩日，然後又趕住喺初三呢個出Game日開門做生意，等大家可以散吓𢭃返嚟嘅利是錢之餘，又可以買到新機同新Game。
今年嘅賀歲波加開咗一場，佢就係由日本遠道而嚟嘅《VIRTUASTRIKER3》啦！呢隻GAMECUBE版嘅《VS3》，會喺初三到香港Game場，大家新年𢭃咗咁多利是，係時候重鎚出擊啦！
今次呢隻《VS3》，感覺上同《WINNINGELEVEN》有幾分相似，因為佢將遊戲改得非常有真實球賽嘅感覺，而GAMECUBE呢個最新版本，除咗會加入一個好似《創造J.LEAGUE職業球會》咁，經營球會嘅新模式之外，重可以自己Edit原創球員，絕對係一Game兩味，如果有GAMECUBE主機嘅人，又點可以錯過呢！
機種：GAMECUBE
遊戲類型：足球
發行商：SEGA
開發商：AMUSEMENTVISION
發售日期：2月14日
售價：6800日圓（約港幣390元）
對應周邊：DUALSHOCK2、VirtuaFighter4Stick
初三重有一隻趕喺新年檔期推出嘅新Game，筆者所講嘅，就係SEGA所推出嘅《SPACECHANNEL5Part2》，而且重要係PlayStation2及Dreamcast版同期推出，真係照顧晒兩邊主機用家嘅需要。
《SPACECHANNEL5》係SEGA首隻音樂遊戲，所以來頭絕對不小，而兩年後今日推出嘅全新一集，玩法基本上冇乜大改動，都係以靚人靚景，加勁歌熱舞，至於玩法就有啲似跳舞機，而且重追加咗雙打模式，令到遊戲可玩性大大增高，起碼唔使一味同電腦玩咁悶先啦。
機種：PlayStation2、Dreamcast
遊戲類型：音樂
發行商：SEGA
開發商：UGA
發售日期：2月14日
售價：普通版5800日圓（約港幣310元）、Dreamcast限定版9000日圓（約港幣520元）
PlayStation2第一隻中文Game，唔好睇佢好似冇乜名氣，其實近排都不知幾好賣，好多人試完之後都話走漏眼，冇辦法！「好Game有好報」吖嘛！
故事雖然老套到唔可以再老套，講小伙子勇救神秘少女出城堡，但過程就非比尋常！自己顧自己就話容易啫，但係帶住個弱質纖纖嘅女仔又會點呢？過難關之餘重要諗吓點樣帶佢走，真係少啲腦力都會俾隻Game考起。而爆咗機之後，又可以用男女主角嚟雙打，啱晒撞正情人節嘅新年同女友一齊玩！
機種：PlayStation2
遊戲類型：冒險
開發商：SCE
發售日期：發售中（12月6日）
行貨售價：$312
好多人都話，香港嘅小朋友係睇日本漫畫長大，當中最有代表性嘅，當然首推GUNDAM啦！如果各位大朋友新年有節目（例如打麻雀發新年財），冇時間同啲小朋友玩，咁呢隻《機動戰士GUNDAM聯邦VS.自護DX》一定可以幫你陪佢哋玩。
以GUNDAM為題材已經夠晒吸引，而且遊戲操作簡單易明，就算從未玩過同類型嘅動作Game，都好快會上手。
機種：PlayStation2
遊戲類型：動作
發行商：BANDAI
開發商：CAPCOM
發售日期：發售中（12月6日）
行貨售價：$376