恒指彈番106點，聯想（992）升番5.6%。聯想升幅唔細，照計啲相關Call輪應該隻隻生猛，若然按照正股升幅2.5倍計，都會進帳14%。實情唔係咁樣，9069前收市38仙，昨日最叻都係39仙，收33.5仙，散12%。呢隻唔係Put輪，點解會跌？
1個最主要原因，係溢價過高。𠵱家計，9069溢價仍達30.3%（前日去到39.2%）。炒輪，幾時都要睇清楚溢價。
前日急跌嘅聯想Call輪9125，昨日則跟正股彈升20%。9125今年9月到期，現價24.7仙，溢價42.4%，槓桿率13.2倍。除非正股大升，9125必然跑輸其他聯想Call輪。
5隻聯想Call輪，溢價隻隻高，最低嘅係9138，槓桿率亦唔細。以後睇好正股之時，揀聯想輪淨係諗呢件夠嘞。
8號仔電盈有啲新聞，例如大股東增持、數碼港住宅用地部分改建寫字樓，股價升6仙。
電盈短期仍然有勢，揀電盈Call輪短炒，正路對象係9111。收市嗰陣，買賣盤全部莊家掛，冇街外人玩。