迎新春行年宵花市幾乎為指定動作，今年多個春季嘉年華分杯羮，大可視乎閣下喜好心情作選擇，鍾情刺激玩意可挑最新「TopBuzz」機動遊戲；即使依傳統逛花市，不少騎呢產品一樣令人喜出望外。總之，玩到嘔抑或逼餐飽，都會令大家暫且放下生活不快，輕鬆一點度新歲！
記者：馮淑玲、周麗懿
攝影：周旭文、陳智良
模特兒：寺田枝織、RickyKenichi（Imagine）
ImageKid：珮珮
不知是否真的受周遭氣氛影響，從今年維園花巿所見，部分貨品均帶點諷刺與幽默，發洩也好，安慰也好，總之，大家心照不宣。
近期被談論最多的政治人物，非董特首和掃把頭莫屬。有檔主看準這時機，特別以他們作嘜頭，設計出三款孖煙囪賀年，有董特首與扯白旗的老虎狗，代表董特首一出來競選，對手即時要投降，另有特首與「福」字及戴黑超的掃把頭和老虎狗。
從事時裝設計的檔主李先生稱，孖煙囱設計剪裁反傳統，並非以四幅布做成，是以三幅，既可慳布，褲的面積亦較大。尺碼是freesize，從24吋至36吋腰人士都適合。
要馬年行好運，可以買個吉祥襪鎖匙扣，共有8款，備有不同吉祥語句、如「有份肥工」、「桃花連連」、「7A2B」、「橫財就手」、「Fit到漏油」等，多少代表不同人的心聲。
要試吓自己有冇橫財命，可以買個幸運童子。童子備有8色，每個都有一個利是封，內有一張六合彩或三T彩票，但檔主話，彩票只畫上號碼，至於要夢想成真，就煩請自己到投注站下注。
只要按一下馬仔的左耳，便會發出馬叫聲，然後哼出「重有最靚豬腩肉」的音樂，該款馬仔棒共有綠、紅、黑、藍及粉紅五色，除麥兜音樂外，還同時發出四款音樂。
若想與真馬過年，可於今日至年三十，到香港賽馬會設於維園的檔攤。今年是馬會首次擺檔，售賣以馬為主題的紀念品，如「陶瓷福運小馬」、「日式祈福幸運錦囊」、「賀歲文具福袋」、「甜蜜發聲情侶毛毛馬」等。市民購買任何一款紀念品，即可獲贈一套8款的馬年揮春，包括「馬上拍拖」、「馬上發財」、「馬上開工」、「馬上添丁」等。同時，購物滿$50，可獲贈馬年利是封。
今明兩日同場舉辦「慈善賀歲靚馬房」展覽，介紹馬匹習性、身體構造、照料馬匹所需用具，並有六匹雪特蘭小馬，市民只要捐出$20，便可與真馬合照，並獲贈《小駿事件簿之樂在雙魚河》兒童故事書一本，或「電子麒麟」、「靚蝦王」或「原居民」等名駒海報一張。
小休了大半個月，香港春季嘉年華又再揭幕！今次除保留上次的機動遊戲外，還新加一部現時歐洲最流行、首次現身亞洲，價值$11,000,000的「TopBuzz極速大風車」，讓你感受在65呎高空，直墜地面的刺激感覺，想知道點激法？一於跟實寺田和Ricky兩位日籍模特兒轉個圈啦！
玩此部「TopBuzz」需付5個代幣，即$50，平貴見仁見智，最重要希望勿如舊年聖誕出現海鮮價啦！
在澳洲讀書的Ricky玩盡當地的機動遊戲，首次玩TopBuzz的感覺是：「轉轉吓啲離心力幾勁，有啲角度好似跌落地下咁，然後又迅速咁升番起，感覺幾刺激！」
在新西蘭讀的寺田同樣好玩機動遊戲，她說：「初初開始都唔係好刺激，慢慢轉下去嗰陣重可以睜大眼，後來愈轉愈快，眼都睜唔大，我自己從未玩過TopBuzz，感覺VeryGood！」
起初轉動時是初向轉動，加上速度不快，感覺不大強烈，後來座位自轉再加機械臂公轉，天與地一時之間也分不清楚！感覺最刺激的就是當座椅轉動至頭向地面時，機械臂又向下墜，感覺就好似要舂落地下，十分刺激！
除了TopBuzz新機，會場內亦新加了中國村，設有售賣中國手工藝、小食攤位以及有風水命理家即場和你睇相，想知流年有沒有運行，就不要錯過啦！
今年玩旋轉木馬特別有意思，尤其特別運滯的朋友，今年就要來個馬上轉運嘞！（代幣：3個）
攤位遊戲不離掟波拋圈贏公仔，會場內同樣設有34個攤位遊戲，巨型公仔獎品依然是最大噱頭。
年廿九同年三十會去花市，年廿八就去春季嘉年華，但去花市唔會使好多錢，大概$100以下，因為年年有，而且又人逼，都係齋行，但春季嘉年華會使多些，最少$500玩機動遊戲。
上年去花市花費約$100，今年市道不好，應該使少些，但不會去嘉年華，聖誕節都有，過晒氣，而且搶錢，機動遊戲坐地起價，花市就不用。
去嘉年華要看有甚麼玩，若然只有機動遊戲，出國都有得玩，但花市不同，一年一度，買嘢都不會慳，最少用$500。
香港春季嘉年華
地點：黃埔花園紅磡碼頭側
日期：2002年2月8日至2002年2月28日
時間：中午12時至晚上10時（農曆年三十至年初二至晚上11時）
入場費：免費
代幣：$10一個