美股未止跌，港股先回升。美股前晚有利好經濟數據支持，但走勢先高後低，杜指10日線（現處9757）有阻力，最後倒跌27點，收9625。不過港股噚日回升109點，相信都係同長假期前淡友先平倉有關。
呢個禮拜埋單結數，恒指跌173點，跌幅1.6%。睇番周線圖，恒指已連跌5個禮拜，下個禮拜農曆年假，只有個半交易日，如果好友要反攻，應該要趁手，不過暫時睇唔見有利好消息配合。
滙豐（005）噚日升1元，收85.75元。滙豐始終叫座力強，多散戶捧場，不過噚日回升唔代表轉勢，短期87元水平阻力大，升破才現一線曙光，向下若跌破82至84元密集區支持，望落去似乎無險可守。滙豐3月4日公布業績，留意基金大戶動向，如果佢哋大舉沽貨，有東亞（023）前車可鑑，讀者應知如何部署。
港股踏入馬年前，整體形勢仍偏淡，不過恒指9800至10200似乎係今次調整浪底，要舐最後幾滴血，非高手不易為。