第一德勝控股（918）前日勁跌，噚日就勁升，但經紀陳同小初講，話反彈已經完成，唔好以為重有得炒。
第一德勝前日喺只有千二萬元成交下，急跌67.5%，但噚日就最高急升到80仙。經紀陳話，當中不乏投機盤博反彈，所以晏晝回落至58仙收市，成交金額增至4863萬股。
經紀陳又話，第一德勝個莊水緊就係人都知，但前日急跌聽講係因為搵唔到個老闆，但佢就覺得其實係藉口而已，皆因人哋老闆成日都留喺大陸。總之，喺莊家缺水嘅情況下，突然有小量沽盤已經可以玩大插水，兼引發斬倉事件。
根據傳統智慧，呢類大插水case出現後，最多彈一陣就好快玩完，上次惠揚（231）就係一個例子。
另外，亞洲資源（899）自從宣布賣盤後，噚日先至有反應，升13.3%，收3.4仙。經紀黃話，隻股新老闆喺國內做地產投資，但與證券界亦關係密切，可以留意。