好多人都知小小超李澤楷九四年喺石澳買咗間獨立屋，由於佢對間富貴木屋要求好高，所以到𠵱家都重搞緊建築同裝修工程。八方噚日一返公司，就收到一單「欠薪疑雲」，話說有一班幫小小超富貴木屋做工程嘅工人投訴，指佢哋二十幾人被判頭拖欠個幾月人工，計計埋埋成百幾萬，𠵱家追討無路。
八方聽完工人嘅心聲之後，當然即刻向負責小小超間大宅工程嘅公司負責人求證，有關方面亦即刻跟進，負責人話由總承建商至分判商都冇拖欠薪金問題，亦冇工人話被拖欠薪金，重話有啲工人啱啱喺前日簽收咗新一期糧㖭。
其實年近歲晚，加上經濟不景，八方都希望類似欠薪事件只係一場誤會，真係唔想再聽到咁多失業欠薪嘅消息。
（圖）小小超對間富貴木屋嘅要求有幾高？齋睇佢裝修咗八年都重未搞掂就知。 資料圖片
E-mail：