曾於去年多個國際性車展中亮相嘅福特Fusion概念車，早前經已有消息傳出，謂新車將會於今年秋季面世；而最近就有外國傳媒拍攝到新車正在測試時嘅相片，家陣不如一齊嚟先睹為快啦。
從相片中可以睇到，以新款Fiesta作設計平台嘅Fusion小型MPV車，其造型與去年於各車展會場內展出嘅概念型號相近，除予人有吸引性之外，一對直立式尾燈編排，更能給予尾隨駕駛者有明確嘅提示㖭。至於車廂布局方面，雖然廠方並未公布有關新車嘅確實車廂配搭資料；但Fusion嘅尺碼較Fiesta大，故此相信佢嘅車廂空間會來得更寬敞。而引擎配搭亦會與新版Fiesta相近，當中包括有1.4及1.6公升型號，隨後相信會有更多引擎配搭出現㗎。新車快者可望於今年秋季面世，各位車迷不妨拭目以待喇。